Dawa ka FKJGP ban kem mardor ia ki bar jylla ba kynshoit pyrshah jaidbynriew

Shillong: Ka seng Federation of Khasi Jaiñtia & Garo People (FKJGP) kala dawa ia ka Tnad Meghalaya Police ban kem mardor ia ki briew (bar jylla) kiba kynshoit ban hiar thma pyrshah ia ki paid Khasi-Pnar lyngba ki Social Media.

Ha ka kyrwoh, ka FKJGP kala dawa ia ka Tnad Pulit ban register da ka Sou Moto Case pyrshah ia kine ki briew (bar Jylla) bad ban pynngat ruh ia ki ha ki kyndon bapher bapher jong ka Indian Penal Code (IPC) bad ka Information Technology Act.

Ka la ong ba katkum ka Whatsapp Group bala ai kyrteng ‘United for Equality’ bala thaw da ki bar jylla, ki dkhot jong kane ka Whatsapp Group kila pynsaphriang ia ka mynsiem pynhiar kput bad ka mynsiem ban buh shun ia ka Jaidbynriew Khasi ha kaba la kyntu ruh ia ki dkhot ba kin kynjat naphang ia ki samla Khasi haba iakynduh bad ban pyniap klep ruh ia ki. “Ngi sngewthuh ba kane ka Whatsapp Group ka dei kaba mih hadien ka jingkhynra Trading Licence jong ka KHADC. Ka jing pyni bor jong ki bar jylla kala paw shai naduh kane ka sngi. Na ki jingthoh kiba la pynsaphriang, ngi sngewthuh ruh ba kane ka kam ka dei jong ki riewshit niam Hindu” ong u Bah Eldie Newton Lyngdoh, Vice President ka FKJGP.
“Baroh ki jingthoh ba pyrshah ia ka Jaidbynriew Khasi ha ka ‘United for Equality’ group kila saphriang mynta ha kylleng ym tang ha Jylla hynrei hapoh ka Ri baroh kawei lyngba ki Social Media kynthup ka Facebook, Whatsapp bad kiwei kiwei. Ki jingthoh ki dei kiba kynshoit ban wanrah ia ka jingsngew iapher jaidbynriew bad ban thombor naphang ia ki Khasi” ula ong.

Une u Nongialam ka FKJGP ula ong “Lada ka Tnad Pulit kam leh eiei mardor, mano ban shim ia ka jingkitkhlieh lada mih ka jingia umsnam kaba shyrkhei tang na ka daw jong kine ki bar jylla kiba wanrah ia ka jingpynshit jaidbynriew”.U Bah Eldie u ong ba ka KHADC kala khynra ia ka Trading Licence kat kum ka bor bala pynkup da ka riti synshar ka Ri ym ba ka leh donbor ia kita ki bar jylla ba shong dukan madan. U ong ba ki bar jylla ki dei ban sngewthuh bad burom ia ka bor jong ka KHADC ym ban kynshoit sha ka jingiaumsnam”.Une u Nongialam ka FKJGP ula dawa ia ka Tnad Meghalaya Police ba ka dei register case hi dalade ia kine ki briew bad ban thwet ia ki nalor ban ai ruh ka jingpynsajia kaba tyngeh.