Ingkhong ka ïing ha Jukiang

Nongpoh, 02 Naitung:
Kawei ka ïing ba la long trai da u Bah Jestid Lyngdoh Nongrang bad ka Kong Darihun Kur bah kaba don ha ka shnong Jukiang, Ri-Bhoi district kaba jngai kumba 14 km ei ei na Umsning ha ka surok ban leit sha Mawrong, ka la ingkhong khait hynnin ka janmiet ha ka por kumba 6:30 ei ei.
Ha katei ka jingjia, baroh ki mar ki mata jong katei ka ïing ki la duh lut namar ka ding ka la iohbam duh syndon plain watla kam dei shuh ka por beh lyer bad ba ka jinglut baroh haba kheiñ kyllum ka la kot sha ka T.1.50 lak ei ei.
Na ka liang kiba ha ïing bad ki trai ïing ki la pyntip ia kane ka jingjia sha ki pulit ka Umsning Outpost ban leh ia kaba donkam.
Ka RBYF, 12 Shnong Circle ruh ka la phah ia ka khubor sngewlem sha ki dkhot bad ki trai jong katei ka ïing kiba la mad ia katei ka jingjia bad kiba la duh ia baroh ki jingdon jingem hapoh katei ka ïing.
Ka RBYF ka kyrpad lang ruh ia ka Umsning C & RD Block ban pynioh ia ki la jingiarap sha katei ka ïing kaba la ingkhong ha ka jingbam duh ka ding.