Byrngem beh dorbar ka shongknor ia ki MDC liang pyrshah Ba pynthut, ha ka jing ia tainia ha Iing Dorbar

Shillong,1Naitung:
Tang mar ia sdang ban ia kren ia ki ain jong ka KHADC ha kaba ia dei bad ka jing pynkylla ia ki ain jong ki hima, ka ing Dorbar ka KHADC, ka la khih phaloh bad ka la thnam tar, namar ba ka liang pyrshah kam ailad ban iaid shakhmat, ha kaba ia dei bad kitei ki mat. Hynrei ka shongknor kaba pyniaid Dorbar ka kong Teilinia Thangkhiew ruh kam shym la ailad ia ki liang pyrshah ba kin pynkulmar Dorbar, namar ba ka la shim ba katkum ki kyndon lada ki kwah ban iatai ki la dei ban phah da ka jingthoh, ba ki kwah ban pynkylla ia kitei ki ain, hynrei namar ba kim phah jingthoh, ka la pynpaw ba kim kwah ban iatai.
Hamar ba ka Dorbar ka khluit tar, na ka jingiatha lain hapdeng u nongialam liang pyrshah u bah Pynshngain N Syiem bad u CEM ka KHADC u bah Ardent Miller Basaiawmoit, ka shongknor ka la hukum ia ki liang pyrshah ba kin ym knieh ktien, hynrei ki iai bteng ban ia kynrup ktien iwei ia iwei bad ha katei ka por ka la pyndonkam ia ka bor ba la pynkup ha ka, bad ka la thmu ban beh Dorbar noh ia ki MDC kiba ia leh pyrshah ia ka hukum jong ka, kaba ka la batai ba kat kum ki kyndon ain ka lah ban beh Dorbar ia ki, hynrei shuwa ba ka shongknor kan beh, ki MDC ka liang pyrshah ki la mih jyndat noh na Ing Dorbar ban pynpaw ba kim ai ka jingiatreilang bad ka EC kaba mynta.
Kham hadien ba la wai ka Dorbar, ki nong thohkhubor, ki la ioh ban ia kren bad ka shongknor ka KHADC ka kong Teilinia Thangkhiew, ha kaba ka la ong ba kum ka shongknor kan ym ailad ba ka bor ba la pynkup ha ka, kan noh shilliang, bad ka la ong ruh ba lada ki liang pyrshah ki kwah ban iatai bad jin lada ki wanrah ia ka mat ban iatai, da ka jingthoh, kan ailad ia ki ban iatai hapoh Dorbar. Ha kaba ia dei bad ka Hima Bhowal kaba dang don hapoh ka Kashari, ka kong Teilinia ka la ong ba ka pan jingmut na ki nongiasaid ain jong ka High Court, ym na ki nongiasaid ain jong ka KHADC, ha kaba ki la ai jingmut ba wat la ka kam ka dang don hapoh kashari, hynrei kan ym don jingktah pat bad ka jingiatai ha Ing Dorbar. Ka la ong ruh ba katkum ka Rule 30 jong ka AD Rule lah ban iatai ia katei ka kam hapoh Ing Dorbar.