Hukum u CJM ban aiti ia ki kot ki sla sha ki pulit Halor ka kam sia lieh

Shillong,1 Naitung:
U Chief Judicial Ma gistrate (CJM) ha ka sngi Nyngkong u la hukum ia ka Central Bureau of Investigation (CBI) ban aiti ia ki kot ki sla ha ki pulit halor ka kynrum kynram pyndam sia liah ha ka kam nonghikai jong ka tnad pule puthi ka jylla.
U CJM u B Joshi u la pynmih ia ka hukum ba baroh ki kot ki sla kiba iadei bad ka jyrsieh sia lieh dei ban aiti sha ki pulit.
Kane ka hukum ka Kashari ka la mih hadien ba u Inspector Bah N Khongthohrem, u officer in-charge ka Laitumkhrah police station u la kyrpad sha u SP ka CBI, Shillong ban aiti ia ki kot ki sla kiba iadei bad ka jyrsieh thung kam nonghikai ha ki Lower Primary School ba la kurup da ka CBI. Ha ka jingbishar kaba long ha ka 4 tarik Jylliew, u nongiasaid ain ka CBI u kyntait ban aiti ia ki kot ki sla sha ki pulit.
Ka Kashari ka la bthah hadien ka dorkhas ba la thep da ka Kong Agnes Kharshiing na ka Civil Society Women’s Organization (CSWO) halor ka jingbym lah ka tnad pulit ban pynshitom halor ka FIR ba la ujor ha ka 18 Naitung, 2011 halor kane kam.
Shwa ia kane, ka kashari ka la bthah ia u Investigating Officer (IO) ban ai ia ka kaiphod ka jingtohkit bad ban pynsted ia ka jingtohkit.