Kut noh ka lympung ialehkai phutbol ka UBYCC ha shnong Umsawkhwan

Nongpoh: Ka Nongthymmai Sports & Cultural Club, ka la ioh ban rah ia ka namlahduh ha ka lympung ialehkai phutbol kaba la pynlong da ka Umsning Block Youth Congress Committee (UBYCC), kata hadien ba ki la lah ban pynliem noh da 1-0 pyrshah ia ka Umbir Sports Club, ha ka jingiakhun phainal kaba la long hynnin ka sngi ha Madan ialehkai ka shnong Umsawkhwan.

Khyndiat haba phai sha ka jingiakhun phainal, da shisha ka jingiakhun ka la long shisha ka jingiakhun kaba itynnad bad kaba iakhaid bha, namar ki rangialehkai jong kitei ki arkynhun, ki la sei shisha ia kata ka jingialehkai kaba itynnad bad kaba shongshit, khamtam eh nalor ka jingdon ki paidbah kiba la wan ai jingkyrshan ia kitei ki kynhun kiba la poi sha ka phainal.
Ha katei ka phainal, ka kynhun ialehkai ka Nongthymmai S&CC, ka la ioh ban pynkhih ha ka kylla step jong ka jingiakhun bad kaba la pynkut noh ia ka kylla step da 1-0.

Haba bteng ka kylla miet,ka jingiakhun ka la nangitynnad namar kitei ki kynhun, ki la nangtrei shitom na ka bynta ban ioh thep kol bad khamtam eh ia ka ki rangialehkai ka Umbir SC, kiba la shah tam ha ka Nongthymmai, hynrei haduh kaba kut jong ka jingiakhun ki rangialehkai ka Umbir SC, kim shem la lah ban thep kol bad kaba la pynlong ia ka kynhun ba kan pdiang ia ka namrem kaba 1-0 ha khmat ka Nongthymmai S&CC.
Ka Nongthymmai S&CC, kaba la ioh ban rah ia ka nam lahduh, ka la ioh ban khur ia ka song pisa kaba T. 30000/- lem bad ka trophy, katba ka Umbir kaba la shah rem noh ha katei ka jingiakhun phainal ka la khur iaka song pisa kaba long T.15000/- lem bad ka trophy.
Nalor ka khusnam sha ki kynhun, na ka liang ki UBYCC ka la sam ruh iaki khusnam shimet ha katei ka sngi ba kynthup iaka nam top scorer, Shemjingmut Kharmyndai naka Umbir, Best Goalkeeper ba ioh da u Ferdinand Makri naka Nongthymmai Umsning bad ka naam Best Player la rah da u Micheal Timung naka Rongmesek.
Ha kaba kut jong katei ka lympung ialehkai, la sakhi da ka jingdon u Bah James Lyngdoh Working President ka MPCC kum u kongsan haka jingdon lang u Bah Rocky Marwein Working President ka Umsning Block Congress Committee, Bah MG Kharshanlor, Bah GG Marwein lem bad kiwei kiwei ki riew rangbah bad ki nongkitkam ka party Congress.