Sdang shalan dewiong tuh ha Jaintia, shah kem 1 trok

Shillong, 1 Naitung:
Ha ka 28 tarik u jylliew ha ka por 2 baje nohphai sngi katba ki pulit ka Lumshnong AD Camp ki dang iaid pahara ha kitei ki thain, ki la ioh kem dia kawei ka trok kaba don ia u nombar AS-25F-3342, kaba la kit dewiong, katei ka trok ka dei kaba la niah da u Medister Tyngkan. Ki pulit ki la iathuh ba katei ka trok ba ki la ioh kem ka dei kaba kit dewiong na ka bynta ban leit buh sha ki kar khana dewbilat ha Lum shnong, ki la ong ba kitei ik dewiong ki dei kiba shu die tuh sha ki karkhana dewbilat.
Ha kawei pat ka khubor na ki lad khubor, la iathuh ba watla ka hukum ka National Green Tribunal ka dang treikam kaba la khang pyrshah ia ka jingshalan dewiong bad ka jingtih dewiong ha ka jylla, bad kaba la aiti ha ka komiti ban pyndep ia ka ingtohkit ia ki dewiong ba la dep sei na ka bynta ba kin ioh die hapoh 3 bnai ka por ba la buh. Hynrei la ioh jingtip ba ha ki thain Jaintia ka la don ka jingshalan tuh ia u dewiong sha ki karkhana pynmih dewbilat kiba don ha Lumshnong. La iathuh ba ia katei ka kam la leh ha ka por mynmiet ha ka por ba ka pyrthei ka dang ioh thiah lyngngai, ki lad khubor ki la iathuh ruh ba ka la don ka jingiapynbeit lypa bad ki heh ki karkhana bad ki trai dewiong ia ka dor ka mur, bad la ong ba ki karkhana ki la shim kabu ban thied ia kitei ki dewiong ha ka dor kaba tad eh ban ia ka dor ba ki ju die.