Pass suk ka KHADC, 5 tylli ki Bill bym don liang pyrshah

Shillong,1 Naitung:
Hadien ka jingmih jyndat ki MDC ka liang pyrshah napoh Ing Dor bar ka KHADC kaba la long mynta ka sngi, ka dorbar ka la ioh ban pass da kaba suk ia baroh 5 tyl li ki ain, khlem kano kano ka jingpynthut.
Kitei ki 5 tylli ki Bill ba ka Dorbar Lyiur ba khadduh ka KHADC ka la pass ki kynthup ia ka 2nd Ammendment Bill 2014 kaba dei na bynta ka jingthung Sirdar bad Rang bah shnong ha Jyr ngam Sirdarship, First Am mendment Bill 2014 kaba dei na ka bynta ka jing thung lane jingjied Syiem, Acting Syiem, Myntri, Basan bad Rangbah Shnong hapoh Bhowal Syiemship, First Ammend ment Bill na ka bynta ban thung bad jied Syiem, Deputy Syiem, bad Elector jong ka Maharm Syiem ship, ka jingthung lane jingjied Lyngdoh, Myntri, Bakhraw lane Rangbah Shnong jong ka Mawphlang Lyngdohship Bill 2014 bad ka jingthung lane jingjied Sirdar nad Sordar ka Nongmynsaw Sirdarship 2013.
Lah ban kdew ba ha katei ka Dorbar lait noh ka shongknor bad u Deputy Chairman , ki la don tang 13 ngut ki MDC kiba don ha ka liang synshar kiba don hapoh Ing Dorbar katba ki MDC ka liang pyrshah pat ki la mih jyndat napoh Ing Dorbar.
Ha kaba nyngkong, ha ka por ba ka Chairperson ka kong Teilinia Thangkhiew ka la phah pynshai halor kitei ki Bill ia u EM Incharge ka Elaka bad Hima u bah P.K Pangniang da kaba sdang na ka Jyrngem Sirdarship, ki liang pyrshah ki la ieng ban pyrshah hynrei ka shongknor kam shym la ailad ia ki ban kren namar ka la ong ba ki khlem buh Ammendment ban ia kren hapoh Ing Dorbar na ka bynta katei ka Bill.
Hynrei haba kim shym la ioh lad shuh ban ia kren namar ka jingkhang pyrshah ka shongknor, ki MDC ka liang pyrshah ki la mih jyndat noh bad ki la kynnoh ba ka dei ka jingleh donbor jong ka EC. Ha katei ka por ka la don ka jingiathalain kaba shipor hapdeng u nongialam ka liang pyrshah u bah Pynshngain N syiem bad u CEM ka KHADC u bah Ardent Basaiawmoit, ha kaba ka la mih ruh ka jingkynthah na u CEM ka KHADC ba ki liang pyrshah khamtam kiba dei ki nongialam ba kham rangbah ha ka politik, ki la dei ban don ka jingleh rain ban ia leh pyrshah ia ki kyndon ka ain.