Ka long ka burom ia ka 6 Shnong Wah Lukha Association

Ka long ka burom ia ka 6 Shnong Wah Lukha Association namar ka jingjop ba don burom jong ka ia ka jingthmu ka Meghalaya State Pollution Control Board Shillong ba ka la lah ban khang pyrshah ia ka Public Hearing ha ka 19.10.2019 ba ka jingthmu jong ka ban pynioh ia ka jingkwah rhah ka M/s Star Cement, Meghalaya Ltd., ban tih ia u Maw Shun ha ka Shnong Brichynrot, Elaka Narpuh.

Ym lah ban len ia ka jingiarap ba radbah ki khun ka Ri Jaintia ( ki Pnar kiba shong ha ki bynta ba hapdeng ), ki War (ba la khot mynta War Jaintia) kiba sha ka liang Bangladesh bad ki Bhoi (kiba khot mynta ki Karbi) kiba shong shaphang shatei. Kine don la ki seng trei mon sngewbha (N.G.O.), kiba kup ha ka kyrteng Jaintia bad ha ka kyrteng Khasi ruh. Kumjuh ruh kiwei de ki seng bhalang bad ki shnong kiba paw ha ki kot khubor ba la pynpaw ia ka jingsngewnguh da katei ka seng 6 Shnong Wah Lukha Association . Ka Jowai Civic Awareness Committee, Jowai ka long kawei na ki seng bhalang ba la thoh pyrshah ia ka jingthmu ka M/s Star Cement, Meghalaya Ltd., lyngba ka Meghalaya State Pollution Controll Board, Shillong.

Sngewkmen ban iohi mynta ba ki briew sha kitei ki thain ki la shai ka jingmut jingpyrkhat namar ki la mad ia ki jingeh ki jingjynjar kiba khraw naduh ba la wan ki Cement Factory khamtam ka jingbymioh shuh ka lyer kaba khuid kum ha ki por mynshuwa. Ki um bam um dih bad kiwei kiwei. Ka kular ba sngewthiang ba sngew bang tang ha ka ktien hynrei ym ha ka kam. Ha ka Synod 2019 kaba la long ha Lumshnong la ioh lad ban sngap ia ki jingiathuh ki trai shnong ia ka jingjynjar kiba bun ba mih na ki Cement Factory. La iathuh ruh ba ki ing ki sem ki khynniuh jur ha ka por ba khlong maw shun da ka bor Explosive. Ka shnong ka thaw ka la jakhlia lut namar ba la wan bun bun ki dkhar ki lyngkieng na ka bynta ki kam ha ki rukom bapher bapher.

Ka Jowai Civic Awareness Committee, Jowai ka kit bok kit rwiang ia phi ka 6 Shnong Wah Lukha Association ba phin nang iai tylli shuh shuh na ki ki por sha ki por ha ka ban khang pyrshah ia ki jingpynjot ia ki khlaw ki btap, ki par maw shun , ki pubon ba pawnam, ki sim ki doh, mrad ki mreng ba bun jait , ki wah bad kiwei kiwei de.

Khadduh khadwai ka jingkyrpad ia u wei U Waheh uba ju long u Ex- Minister i/c Industries ka Meghalaya mynshuwa u ban na sha ka to ka Constuency. La ong ba dei ha ka por jong u ba la wallam ia ka bar jylla ban thaw Cement Factory. La iathuh u long ruh u nongiarap ban pynioh jaka mawshun haduh mynta.Ka la dei ka por mynta ba un sngewbha ban kein noh. Kane ka kam ka long la kham slem bha bad tharai u la biang nadong shadong haduh kine ki sngi. Un sngewbha ban isynei bad pyrkhat sngewlem ia ki khun ki hajar kiba la jied ia u ha ki por mynshuwa. To ai ba kin shong suk shong sain noh mynta bad pateng ka ban wa. To ia tylli da sumar ioh phin kyllon. Kumjuh ka ktien u Blei ka ong “Ia ka jingioh kynti jong ngi la pynkylla ha ki nongwei. Ngi la dih ia la jong ka um ngi da siew sbai. Ia la ki jong ki dieng, la die ha ngi.

Khublei shibun,

Secretary,
Jowai Civic Awareness Committee, Jowai.