Pynbna jaka sah dohkha ka Dorbar Shnong Mutong

Jowai: Ka dorbar Shnong Mutong ha East Jaintia Hills District myn hynnin ka sngi ka la pynbna paidbah ba ia ka thwei kaba don ha kawei na ki bynta jong ka wah Myntdu, la plie pyrda ia ka kum ka jaka shong jaka sah ki dohkha dohpnat khlem dei shuh ban pynwit ia ki lada u khwai, jar ne da kino kino ki rukom.

Ia kane ka bynta ba la pynbna kum ka Fish Santuary, la tip kum ka Kai-Lang-dong kaba dei ka bynta jong ka wah Myntdu.

U Rangbah Shnong ka shnong Mutong u ma Helping Phawa uba dei ruh u MDC barim u la iathuh ba ka dorbar shnong ka la rai ban pynlong ia ka jaka naduh Phansyiar haduh Shka Hali u ma Salong Phawa kum ka Fish Sanctuary bad ha kine ki jaka yn nym shah shuh ia ki rawon ban kwai.
Ka Dorbar Shnong ka la mana ruh ia ki riew shim kabu kiba wan ban pyniap dusmon ia ki dohkha kiba don haka ha baroh ki wah kiba don hapoh u pud u sam ka shnong da kaba aibih, shoh kha-ru, tongjar lane da ki kynja bom dynamite. Ka dorbar shnong kan pynshitom ia kito kiba leh pyrshah katkum ki kyndon ka bor shnong bad ruh ka ain sorkar.
Ia kane ka Kai-Langdong Aqua Fish Santuary la plie paidbah mynta ka sngi da u ma Balios Swer uba dei u riew paw khmat ka rilum Jaintia.