Kylli ki 13 Seng ia ka Sorkar, halor ka ain khanglad bar Jylla

Shillong,30 Jylliew:
Ki 13 Sengbhalang kiba ia khih ban dawa ILP, ki la pynpaw ba ki kwah ban tip noh na ka sorkar jylla, ia kiei ki ain, kiba ka do jingthmu ban pyntrei kam, kumba ki la dep ia kren ha u bnai Iaiong ba ladep.
Haba ia kren bad u President ka FKJGP u bah Joe Marwein u la ong ba ki 13 seng ki kwah ban tip aiu ka sorkar ka la leh, bad kumno ka la iaid ban pyntreikam ia kita ki ain kiba ki la ia kren ha u iaiong mynta u snem, kiba long kita ki ain kiba ki 13 seng ki la dep ia kren bad ka sorkar ba kan pyntreikam ha ka jaka ka ILP.
Lah ban pynkyn maw ba ha U Iaiong mynta u snem, ki 13 sengbhalang ki la ia kynduh ia u myntri rangbah ka sorkar jylla u Dr.Mukul Sangma, ha kaba ki la iakren ban thaw da kiwei pat ki ain, kiba ia syriem bad ka ILP, na ka bynta ban khang lad ia ka jingwan tuid kyrthep ki mynder sha kane ka jylla. Ha katei ka jingiakren ki sengbhalang ki la hun ban ia kren da ka phang kaba beit lang baroh ar liang namar ba ki la ong ba ka dei ka mat kaba donkam kyrkieh, hynrei ki la ong ba kin ym kynran dien na ka jingdawa ILP bad kat bym pat ioh ia ka ILP, kin nang pyntreikam shuwa da kita ki ain ba ki la dep ia kren bad ki bor sorkar.
Hynrei mynta lah lai bnai, haba ka sorkar kam shym ai ktien eiei ruh em, kumta ki sengbhalang, ki la rai ban pan jing pynshai na ka sorkar Jylla, ia ka jingmut kaba ka don halade, na bynta katei ka ain ban khanglad ia ka jingwan tuid ki bar Jylla.