Bishar ka KHADC, ban shim khajna na kiba iakop khwai dohkha

Shillong,30 Jylliew:
Ka tnad Fisheries ka KHADC ka dei ka tnad kaba pynlut kham bun ban ia ki jingmih, dei halor katei ka phang ba u MDC ka Sohra u bah Donevan Kharwanlang u la ai jingmut ia ka Executive Committee ba kan jin da la long ka lad kamai pisa ia ka KHADC ruh lada kan shim khajna na ki kynhun kiba pyniakhun ia ka jingiakop khwai ( Fishing Competition), namarba u la kdew sba katei ka jing iakop kaba mih pisa da ki lak lak tyngka ruh ki long shibynta kum ki jingiakhaii ne ki kynja Fete.
Haba pynshai halor katei ka jingai jingmut u CEM ka KHADC u bah Ardent Basaiawmoit, u la pynpaw ba katei ka jingai jingmut ka long kaba sngew dei , bad ka EC kan eksamin bad bishar ia katei ka kam, u CEM u la ong ruh ba lada ki kynhun shimet lane ki Group ki lah ban kamai da ki lak tyngka ha ka shisngi, ka KHADC ruh ka dei ban ioh kamai lang, u la ong ba ka EC kan sa leh eiei halor katei ka kam.
U MDC ka Sohra u la ai jingmut ruh ia ka Council ba kan kynthup noh ia ki nongiasaid –ain, ki nongkhaii khamtam ha ki khappud ba ki dei ban siew ia ka Professional Tax, u la ai jingmut ruh ban kham pynheh ia ka bai NOC, kaba ka Council ka ju shsim T.1000 tyngka na kawei ka karkhana heh, ban pynkiew ia ka labour laisen bad ia ka trading license kumjuh.
U bah Antonio War haba ia shim bynta lang ha Ing Dorbar ka KHADC u la ong ba ka jingshim khajna ka KHADC kumba ka long mynta kam iahap, namarba ia kito ki kontraktor kiba kamai T.5 lak shisnem ruh ka shim T.2500 tyngka katba ia kito ki company kiba heh ba heh kiba ju kamai da ki spah klur tyngka ruh ka shim ka juh hi ka dor T.2500 tyngka. U la ai jingmut ba ka la dei ban pyniapher noh ia kane ban phiah ha la ka jong ka bynta.