“Ka Khuri pynshad Lyngwit!”

AIS Suja

Ka Khuri pynshad lyngwit!? Ka thew ia u briew uba dihbhor u bym nangiaid beit shuh ha la ka lynti, u buaid sheng sheng sha ka mon sheng sheng sha ka diang. Pynshad sha ka mon ka diang.

Sngap, u Blei u ong – “Ngan pyllong ia ka Jerusalem, ka khuri pynshad lyngwit ha ki paidbah baroh sawdong bad halor ki Judah ruh kan long ha kata ka jingker kut ia ka Jerusalem” Sekharaiah 12:2.

Katno sien la ker kut ia ka Jerusalem? Kumba 40 sien ei ei. La pynjot 30 sien ei ei. La synshar ia ka da kiba bun ki syiem pyrthei kumba 25 sien.
Ym tang mynshwa, hynrei mynta ruh bun ki ri ki kwah ban ktah ne hiar thma ha Jerusalem khamtam ki ri Arab Middle East, hynrei ka Jerusalem ka iaineh hi ka Jerusalem tad haduh ka jingwan pat u Jisu sha kane ka pyrthei.
U Blei u bitar ia kino kino ki ri kiba ktah kti ia ka Jerusalem. U ong – “Uta uba ktah ia pha, u ktah ia i briew khmat jong nga” Sekharaiah 2:8. Dei na kata ka daw ba kano kano ka ri kaba ktah ia ka Jerusalem, kin kylla long noh kum ki buaid kiba tare shane shatai, ki bym tip briew ki king janor ka khlieh. Kumta ka Jerusalem ka Nongbah jong ka Israel, ka dei ka khmat jong u Blei bad um shah ba u briew un ktah ia ka khmat jong u. Ym don ruh u briew uba lah ban shah ba u para briew un ktah kulmar ia ka khmat jong u ne ban tyndung ia ka pyllew khmat bad kan long ka jingbitar lada kin leh kumta. Ha kajuh ka rukom hapdeng u Blei bad ka Jerusalem.
Kumta kano kano ka Ri kaba hiar thma ha Jerusalem, kan long ka jingjot jong ki hi, namar u Blei u la kren. Balei u Blei um shah ban leh kumta ia ka Jerusalem? Namar ka dei ka jaka ki sla kjat jong u. “Ngan pyndon burom ia ka jaka ki sla kjat jong nga” Isaiah 60:13. Ngi tip ba u Blei u long uba khraw, u shong ha Bneng bad ki kjat jong u ha khyndew, ha Jerusalem kein. “Ka Bneng, ka long ka khet jong nga, ka khyndew ka jingiuh kjat jong nga” ki kam ki Apostol 7:49.
Ia ka Jerusalem, u Blei u ong – “Kane (Jerusalem) kein ka jaka shongthait jong nga junom; hangne ngan shongneh namar nga la imon ia ka” Salm 132:14. Namar ha Jerusalem, u Blei un pynieng la ka khet. Jeremaiah 3:17. Ka Jerusalem ka dei ka nongbah jong u Syiem uba khraw, u Jisu Khrist kein. Mathaios 5:35. Bad un synshar ia ka pyrthei na Jerusalem. Loukas 1:31-33.
U Blei u pynshad lyngwit beit kat ia kiba ktah ia ka Jerusalem, un ym shah ban pynjakhlia ne pynjot ia ka, namar un sa wan pat (u Jisu) sha kane ka pyrthei bad un pyllong ia ka Jerusalem ka jaka ka jingkmen jong u sa shisien pat. “Ngan pyllong ka jingshad kmen ha Jerusalem bad ka jingkmen ia u paidlang jong nga” Isaiah 65:8. Un kmen ha Israel bad ha kita baroh kiba ieit ia u, ym tang ia ki Jiw hynrei Jentil ruh.
Dei halor kine kiei kiei ba u Blei u pynkynmaw ia ki briew da kaba u ong – “To duwai, na ka bynta ka jingsuk ka Jerusalem” “Pray for the peace of Jerusalem”. Bad lada ngin duwai ia ka Jerusalem, u Blei un kyrkhu. “Kiba ieit (kiba duwai) ia pha, kin roi” “May those who Love you, be secure” Salm 122:6. Hato don ne em ba duwai Jerusalem? Lada ngim duwai, ma ngi ruh ngin sha pynshad lyngwit. Ka ktien u Blei ka ong ro kynmaw ban duwai ia ka Nongbah Jerusalem. “Pray for the peace of Jerusalem” Amen.