Ki trai muluk ki shah kynjat ha ka Municipal:Antonio

Shillong,30 Jylliew: Haba kren ha ka Dorbar lyiur ka KHADC kaba la long mynta ka lah sngi u Blei, u MDC ka Laitumkhrah uba don ha ka liang pyrshah u bah Antonio War, u la pynpaw ia ka jingsngewkhia halor ka jingshah khniot ki nongdie madan kiba dei ki trai muluk trai jaka ha ka Municipal, u la ong “Ki trai muluk ki trai jaka ki shah kynjat ha ka Municipal, ba ki shong die madan, kata ruh tang kito kiba die jhur tang ha ka por janmiet, ia kane nga la iohi ha Laitum khrah bad sha kiwei pat ki bynta, hynrei ki khar die madan pat naduh ki khar alumuri bad kiwei ki shong bad step bad miet ym don patiaw” ong u bah Antonio uba la kyntu ia ka KHADC ba kam dei ban ailad ia kum kitei ki khar die madan ba kin leh laitlan hapoh ki iew ki hat kiba hap hapoh ka jingpeit ka KHADC.

U la ong ba kitei ruh ki dei ban biang ka laisen. Ha kaba ia dei bad katei ka phang u EM ka tnad khaii pateng ka KHADC (Trade) u bah Latiplang Kharkongor, u la ong ba ka tnad ka dang pynkhreh ban leh eiei ia kitei ki khar die madan, bad ban sam shithi pyntip sha ki. U la pynpaw ka jingsngew khia kumba la kdew da ki MDC ka liang pyrshah ia ka jingshah khniot ki nongrep, bad u la ong ba ka EC kan sa buddien bad eksamin bha bad kan leh eiei ruh halor katei ka kam. Ki MDC ka liang pyrshah ki la pynpaw ka jingsngew kmen ban iohi ba ha kine ki sngi u EM ka tnad khaii pateng u bah Latiplang Kharkongor u la shimkhia ban khang dam noh ia kito ki dukan ki bym biang ia ka Trading Laisen, hynrei ha ka juh ka por ki la ai jingmut ba kan bha ia ka KHADC ban leh husiar ia katei ka kam , namarba kumba ka jingsiew bai Laisen ka long kaba tad eh kata tang T.15 hajar tyngka kawei ka Laisen, hynrei ki dukan bar jylla bunsien ki leit ban ujor sha kashari kaba wanrah pynban ka jingduhnong kaba da ki lak tyngka ia ka KHADc ban ia khun mukotduma. Halor katei ka mat u MDC ka Mawkynrew ruh u bah Banteidor Lyngdoh u la pynpaw ka jingsngewkhia halor ka jingshah khniot ki nongrep, ha kaba ki mahajon ha iew ki ju khniot ia ki da kaba ot kilo ia ki jhur jong ki , bad katei ka jingot ka long palat kaba ki ju ai daw ba ki ot ia ka jingkhia ka byrni , hynrei ki ju ot da ki 5 kilo shajrong na kawei ka byrni phan, halor katei ka phang ruh u EM ka Trade u la ong ba ka tnad kan sa leh kloi ia kaba donkam.