Rakhe ia ka lyngkhuh snem thymmai ka jaitbynriew Khasi

Shillong: Ka sngi lyngkhuh snem thymmai jong ka jaitbynriew Khasi la rakhe lyngba ka jingmaitphang jong u Rangbah Spiton Kharakor, u nongthoh ba kynsai shaphang ki riti dustur bad khana pateng Khasi.

Ka la sdang naduh ka kynti ba rakhe ia ka lyngkhuh snem iap ka ba ar jong u Bah B Nishan Wahlang (bam kwai ha dwar u blei) mynshymsnem ha Riti Academy of Visual Arts. Ha kata ka sngi, u Khliehduh jong ka Synjuk Ki Rangbah Kur, Bah Herman Nongrum u la bynñiaw ba u khlem lah ban pynurlong ia ka jingthrang jong u paralok ba la khlad noh ha kata ka lympung ka ba kynthup ruh ia u Bah Bindo M Lanong, Symbud Myntri Rangbah barim bad Bah H S Shylla, CEM barim jong ka KHADC.

Kum ban pyntngen ïa ka mynsiem pangnud jong u Bah Herman Nongrum, u Bah Spiton Kharakor u la kdew ba ka rngiew jong u Bah B Nishan Wahlang ka dang im bad kumta u la duriap ban tih ban wad bniah ia ka rukom kheiñ snem ki Khasi haduh ban da ïoh kata ka sngi ka ba biang na ka bynta ban rakhe kum ka snem thymmai. Kumta ha ka 27 tarik Risaw ka ba lyngkhuh bad ka sngikha ba hynñiewphew hynriew jong u Bah Spiton Kharakor la pynlong ka peitmiet haduh shiteng synñia ban pdiang burom ia u snem thymmai jong ki Khasi ka ba long ha ka 28tarik Risaw, 2019. Ka jingrakhe ka la long ha ka longïing jong u Bah B Nishan Wahlang (bam kwai ha dwar U Blei) ha ka ba la don lang bad ki bahaiing bahasem, ki paralok bad ki samla na ka Da Thymmei Academy ki ba la ïa phawar bad tem ka ksing ka dhah ban pathai paidbah ïa ka jingwan jong u snem thymmai.
La katto katne bnai ba la thwet la tih sani ban wad jingtip la lah ban pynmih da ka jingthoh ba paka ha ka ba lah ban bud dien na ka bynta ban thaw ka almanak Khasi ha ki snem ki ban wan. Kine kiei kiei baroh la pynshong nongrim ha ka rukom kheiñ bnai bneng bad ka rukom kheiñ sngi ïew ba phra sngi shitaïew jong ki Khasi, ha ka ba la shem ba ka ïajan bha bad ka ta ka Gregorian Calendar ba la pyndonkam ha satlak pyrthei. Lah ban pynkynmaw ba u Bah Spiton Kharakor u dei u nongthoh jong ka kot KI KHUN KI KSIEW U HYNÑIEWTREP ka ba long ka ba nyngkong eh ban lum ïa ki kur ki jait Khasi baroh bad kiwei kiwei ki jynthoh ba kynsai shaphang ka Ri Khasi.