“Ba nga dei ka khun kynthei, don kiba ong pyniap noh” Ha ka por ba dang kha, ong ka Irani

Bhopal, 27 Jylliew:
Ha ka sngi thoh dieng, ka myntri kam pule puthi jong ka sorkar India, ka Smriti Irani, ka iathuh ba ha ka por ba ka dang rit, ka dei kaba la shah tim, namar ba ka dei ka khun kynthei.
“Nga iathuh ha ka sien kaba nyngkong mynta ka kynti, ba ha ka por ba kha ianga, ki do kiba la ong ia ka kmie jongnga, ka khun kynthei ka dei ka pynbunkam, kumta dei ban pyniap noh. Hynrei ka kmie jongnga, ka dei kaba shlur bad kam shym la leh satia kumta bad dei na kata ka daw, ba nga ieng hangne ha khmat jongphi” ong ka Irani, haba kren ha ki samla pule, halor ka jingpyniap noh ia ki khun ha kpoh, lada dei ki kynthei.
Kum katei ka jingjia, dei ban pynduh shi syndon bad ka la ong, ba lada phi hikai ia ka khun kynthei, ka jinghikai kam dei tang ia ka, hynrei ka dei ia ka iing hi baroh kawei, ka ban iarap, ha kaba tei ia ka ri hi baroh kawei.
Halor ka mat, kaba dei na ka bynta ki samla pule, kiba duk, ki bym ioh lad ban leit sha ki jaka pule kiba bha, ka Irani, ka ai jingmut, ba kim dei ban duh mynsiem bad ka iathuh ba ma ka ruh, ka dei kaba wan na ka iing kaba kham shitom, hynrei, ka dei namar ka jing kit khia ki kmie ki kpa jongka, ba ka lah ban long ha kane ka kyrdan kaba mynta.
Ka kynthoh ruh, ba u myntri rangbahduh ruh, u dei mynshwa, tang u nongdie sha, hynrei, u kiew sha ka kyrdan kaba ha jrong duh.