Shimti U Bah Barkos kum u Chief Secretary ka jylla

Shillong, 27 Jylliew:
U Additional Chief Secretary u Bah P Barkos Oflyn Warjri, u la shah thung kum u Chief secretary ba thymmai ka jylla Meghalaya, hadien ba u Bah WMS Pariat, ula shong thait ha ka 30 tarik Jylliew hadien ba la pynjlan ia u hynriew bnai kham mynshwa. Ka kyr woh sorkar ka la pynmih ha kane ka sngi Thoh dieng na ka tnad Personnel. “Kum u Chief Secretary ka sorkar Meghalaya, u Bah P.B.O. Warjri, IAS un long ruh u State Vigilance Commissioner, Meg halaya naduh ka tarik ba u shimti haduh ban pynmih da kawei pat ka hukum”, la ong ka kyrwoh sorkar.
Shwa ia kane, u Bah Warjri u dei u Additional chief secretary ba peit ia ka tnad soil & water conservation bad u chairman ka administrative reform.
U Bah Warjri u dei na ka thup Indian Administrative Service(IAS) jong u snem 1978. La kha ia u ha u snem 1956 bad u kpa jong u Bah Phrangsngi Oflyn Dohling bad ka kmie ka Kong Bilian Warjri ki la pynheh pynsah ia u ha Shillong. U la pyndep ia ka Indian School Certificate na St. Edmund’s School ha u snem 1971 bad ia ka graduate na St. Edmund’s College ha 1976 bad u la leit ban pule ruh ia ka International Studies ha Jawaharlal Nehru University, New Delhi.
Hadien ba u la pyniasoh kum u ophisar IAS ha u snem 1978 jong ka kynhun Manipur-Tripura bad u la shakri ha Manipur haduh u snem 2008 haba u la long u kum principal secretary (Home and Planning).
Ha Manipur u la bat ia ki kambapher bapher kynthup ia ka tnad Food& civil supplies, vigilance, taxes, industries, excise, youth affairs & sports, agriculture, urban development bad kiwei. U long ruh u deputy commissioner jong ka border district ka Chandel ha Manipur. U la shimti hadien kum u Director ka North Eastern Council bad kum u Director Vigilance ka tnad Communications, ha Bangalore.
U iashong bad ka Kong Pauline bad u don ar ngut ki khun u Keith bad u Kenan.