Sah khongreng ka iing dorbar thymmai jong ka KHADC

Shillong,27 Jylliew:
Ka ophis thymmai jong ka tnat shong dorbar jong ka KHADC kaba la trei naduh u snem ba la dep mynta ka la sah khong reng bad la iohi ba ki nongtrei kim bteng shuh ia ka kam ban tei ia katei ka ing kaba dei ruh shi bynta na ka ing ban pyn long Ing Dorbar ka KHADC. Ia katei ka jingtrei, la sdang ban tei ha ka por ba ka KHUDA II ka synshar hapoh KHADC hapoh ka jingialam u bah Pyn shngain N Syiem.
Katkum ki tyllong khubor, la iathuh ba la pynsangeh ia katei ka jingtrei da ka Executive Committee ba thymmai mynta hapoh ka jingialam u bah Ardent Miller Basa iawmoit. La iathuh ba katei ka jingpynsangeh trei ia katei ka kam, ka wanrah ka jingma kaba khraw ia ka KHADC, kaba lehse ka lah ban mih ka jingduhnon pynban namar ba ioh u kontraktor uba pyntrei ia katei ka kam u lah ban wan dawa ia ki jinglut kiba u la dep ban pyntrei, kaba ka jingdawa jong u kan long pynban kaba heh.
Ka tyllong khubor ka la iathuh ba ka EC ka la pynsangeh trei ia katei ka iing thymmai, khlem da iaid ia ki kyndon, hynrei la shu hukum beit da ka jingthoh sha u kontraktor ba um bit ban bteng ia katei ka jingtrei.
Lah ban pynkynmaw ba katei ka jingtrei ka dei kaba la mang ban tei ka la jinglut kaba T.4 klur tam, katei ka ing ka dei kaba la mang kyrpang na ka bynta ka Legislative Wing ba kynthup ia ka ophis jong ka Legislative , ka Ing Dorbar bad ka Hall jong ka Council. Lah ruh ban pynkynmaw ba ka KHADC ka la don ka jingthmu ba hadien ba la dep ia katei ka ing yn lied noh ia ing kaba rim ba la pyndonkam kum ka Legislative Ophis.
Lah ruh ban pynkynmaw ba halor katei ka Building ka la don ka jingiatai ha Ing dorbar ka KHADC, ha ka Dorbar kaba la long shuwa ban long kane ka Dorbar lyiur kaba mynta. Ha kaba ia dei bad katei ka Bulding kham mynshuwa na ka liang u CEM ka KHADC u bah Ardent Basaiawmoit, u la kren ha ki nongthohkhubor ha ka sngi ba ka EC ka leit jurip ia ka shnong tynrai ha Mawphlang ba katei ka kam hap ban leh da ka Technical Enquiries.
Katei ka mat ka lah ban long kawei na ki mat kiba ki MDC ka liang pyrshah kin ia ther tyngeh ha kane ka ar sngi ba dang sah jong ka Dorbara Lyiur ka ban kut noh ha ka sngi hat majai jong ka taiew ka ban wan.