Mih jyndat ki liang pyrshah na Ing Dorbar ka KHADC Ia khaid ka jingbun paid

Shillong,26 Jylliew:
Sa shisien biang ka Ing Dorbar ka KHADC, ka la khih win mynta ka sngi ha kaba ka la don ka jingiakura miej, ka jingia kyrkait bad ka jingmih jyndat ki MDC, kiba dei na ka liang pyrshah. Katei ka jinghuri hura hapoh ka Ing Dorbar ka KHADC, kaba la pynlong ia u Deputy Chairman ban pynkut noh ia ka Dorbar, ka dei na mar ba ka liang pyrshah hapoh ka jingialam u bah Pynshngain N Syiem kam shym la ailad ban bteng ia ka jingiatai ha kaba ia dei bad ka rukom pyniaid thung Syiem bad kiba khraw ba tri hapoh ka Hima Bhowal.
Lah ban pynkynmaw ba ka iatei ka mat, la wanrah ha ka sngi sdang Dorbar jong ka KHADC kaba la long ha ka 23 tarik U Jylliew, hynrei hadien ba u nongialam ka liang pyrshah u bah P.N Syiem u la pyrshah da kaba ong ba katei ka kam hapoh Hima Bhowal ka dang sah ha kti jong ka ain, ka shongknor ka Ing Dorbar ka kong Teilinia Thangkhiew ka la pynsangeh noh shuwa bad la pynkynriah ia katei ka kam ban ia tai mynta ka sngi.
Hynrei tang mar ia sdang ia kren ia katei ka mat kaba la pynsngew da u Deputy Chairman ka KHADC u bah Pyniaid Sing Syiem; ka Liang pyrshah joit ka la ieng ban pynpaw ia ka jingpyrshah bad ha katei ka por, ka la don ka jingpyni na u Deputy Chairman ba ia katei ka kam, la ioh jingmut lyngba u nongiasaid ain, ( independent advocate), ba ba lah ban iatai hapoh ing Dorbar.
Hynrei ha katei ka por, na ka liang ka liang pyrshah ka la pynpaw ba dei ban pynsangeh ia katei ka mat. Kaba kham phylla ha katei ka Ing Dorbar ka long ba na ka liang pyrshah ka la pan jingpynshai na u Deputy Chairman ka mut aiu ka motion, halor katei ka mat iatai , kaba na ka liang u Deputy Chairman um shym la lah ban ai jubab, bad ka la mih ruh ka jingiakynnoh ba ia u Deputy Chairman la hukum katkum ka mon jong ka EC u bah Ardent Basaiawmoit.
Kaba kham phylla shuh, ba ha katei ka Dorbar na ka liang ki liang pyrshah ki la dawa ba lada yn iaid shakhmat ne yn pynsangeh ia katei ka kam, dei ban peit ia ka jingbun paid, hynrei kaba pynksan ia ki liang pyrshah ha katei ka Dorbar, ka dei namar ba ki la don bun ngut ki MDC ka liang synshar ki bym don hapoh Dorbar bad ka jingbun paid ka la iakhaid, haba u Deputy Chairman lyngba ka jingbthah jong u bah Ardent u la thmu ban pyniaid beit ia ka Dorbar, ki Liang pyrshah kim shym la treh ban ia shsim bynta, kumta u Chairman u la hap ban pynwai noh ia ka Dorbar.