15 minit iasiat, kyllon iap u ULFA ba rahbor nongkhaii Lait im 4ngut ki nongkhaii ba shah rahbor

Shillong, 26 Jylliew:
Saw ngut ki nong khaii na Assam ki la ioh ban pynlait im da ki pulit na kti ki lehnoh United Liberation Front of Asom (ULFA bad uwei u lehnoh kane ka seng u la kyllon iap ha ka jingiather kuli kaba neh kumb 15 minit hynne ka sngi Palei ha Darekgre, kaba don hajan ka Rongmasugre ka West Garo Hills.
Une u lehnoh ULFA uba kyllon iap la tip kyr teng kum u Dharma Kanta Rai, uba tip kum da ka GNLA kum u “Garo cham pa”. U SP ka West Garo hills u Mukesh Singh u la ong ba u Rai u la dei u stad ban pynbthei ia u bomb IED bad la pyndonkam da ki lehnoh ia u ban pynap shrip ia ki pulit. U dei ruh uba donkti ha ki kam rahbor kiba bun, ha kine ki bnai ba la dep ha ka thain Garo hills.
Ki saw ngut ki nongkhaii ba lait im ki kynthup ia u Gulu, Shah Alam, Azgar Ali bad u Atwar Ali baroh ki dei na shnong Kaimbathapara kaba hap ha Phulbari police station. Ki la shah rahbor ha kane ka sngi Balang na shnong Kantanagre ha ka por 9:30 baje mynstep da kaba shah pynap suloi.
U SP ka West Garo hills u la ong ba ki pulit ki la ioh ia ka jingtip kaba bniah ia ka jingdon jong kitei ki nongrahbor bad ki la pynlong ia ka jingkhynra kaba jur ha katei ka thain naduh ka por 6:30 baje mynstep ha Darekgre hajan ka shnong Rongmasugre bad ki la ioh ban pynlait im ia kitei kiba shah rahbor ha ka por 9:30 baje mynstep. “Ar ngut ki nongap jong kitei ki lehnoh ki la iohi ia ki pulit bad ki la siat ha kaba ki pulit ki la pynphai kylla.
Ha ka jingiasiat kaba neh kumba 15 minit eiei uwei u lehnoh ka ULFA u la kyllon iap katba kiwei ki la lait phet da ka said na katei ka jaka da kaba ieh noh ia kitei kiba shah rahbor ha katei ka jaka.
Katkum ka jingong u Singh ki don kumba 9 ngut eiei ki lehnoh ULFA bad ka GNLA kiba donkti ban rahbor ia kitei ki nongkhaii da kaba set ha shnong Darekgre. U la ong ba ki pulit ki dang pynlong ia ka jingtohkit ha ka iing jongno ki ioh rieh tngen ha katei ka shnong.
Hynrei ka khubor bym thikna, ka la ong ba ki rieh ha kawei ka iing jong u rangbah shnong katei ka shnong Darekgre.
U SP u la ong ba ki pulit ki dang ap ia ka jingtip halor kane. U la iathuh ba la ioh kurup ia ki tiar na katei ka jaka kynthup ki pistol, bakhor, kuli, ki AKs, bad ki kot ki sla.
Ki pulit ki la suba jur ba ia kane ka kam la leh da ka jingplan jong u Area Command ka GNLA u Kimpret.
U IGP (operations) u GHP Raju u la ong ba ka GNLA bad ka ULFA ki la donkti ban rahbor ia kitei ki nongkhaii na Dadenggre, Phulbari bad na Tikrikilla. U la ong ba ka ULFA ka ioh ia ka jingkyrshan ka GNLA ha katei ka thain, ban dawa pisa na ki paidbah.