Kitbok ka MFA ba ioh shim bynta ka kong Sankidaroi

Shillong: Ka Meghalaya Football Association (MFA) ka la pynpaw ia ka jingsngew kmen ba ka kong Sankidaroi Sajem ka la lah ban iashim bynta ha ka jingai jinghikai ia ki referee bym iohi ne Blind Football Referee Training Course ba long ha Pattaya, Thailand, ha u bnai ba la dep ba la pynlong da ka International Blind Sports Federation.

Kane ka jingai jinghikai ka la long 27 – 28 tarik Nailur ba la dep ha madan ka Blind Football Asian Championship.

Ka kong Sajem ka la shim bynta ha jingialehkai phutbol ki bym iohi ha ka 3rd North East Blind Football Tournament, kaba long ha Shillong ha u Kyllalyngkot bad ka Meghalaya Football Association ka sngew kmen ban ai ka jingkyrshan ia ka ban pyniar shuh ia ka jingleit iashim bynta jongka shabar ha kane ka jingialehai.
Ka kong Sajem ka dei ka nongialehkai phutbol bad ka la long ka coach bad manager ka kynhun ialehkai ki kynthei ha Meghalaya bad ka dei ruh ka nongtrei ha ka Meghalaya Baby League.