Leit sngewlem u lat ka jylla ia ka met u Archbishop Rev Dominic ha iing mane Laitumkhrah

Shillong: U Lat jong ka Jylla Meghalaya u Tathagata Roy mynta ka sngi u la leit sngewlem ia ka met jong u Archbishop Rev Dominic Jala ha iing mane bah Laitumkhrah kum ka dak ban burom ia Archbishop.

U Lat ka Jylla u la ioh ruh ban ia kren bad kiba ha iing jong u Archbishop bad ka para khatduh kaba la don hapoh iing mane bah ha kane ka por. Na ka liang jong u Lat ka jylla u la pynpaw ia ka jingsngewlem jong u bad duwai na ka bynta ka ka jingjahthai ka mynsiem bymjuh kut jong u Archbishop.

Ha kane ka jingleit sngewlem u Lat la synran lang da u myntri khynnah ba rim jong ka sorkar pdeng u KJ Alphons, u myntri ka tnad ka koit ka khiah u Bah Alexander L Hek. Ha kane ka jingwan la ia kynduh ruh ia u Bishop Rev Victor Lyngdoh u ba la don lang ha kane ka por ha iing mane bah.

Ha kane ka sngi na ka liang jong ki nongialam seng sain pyrthei na ki party bapher bapher, ki la leit ban leh burom khatduh ia u Archbishop mynta ka sngi ia kaba yn sa pyndep ia ka jingtep don burom la shai ka sngi ha iing mane bah Laitumkhrah.