Ka Sngi Snem Thymmai U Khasi, kat kum ka Hynñiewtrep Almanak

U Spiton Kharakor

Kumba u/ka briew shimet ki don la ka jong ka sngi kha sha pyrthei. Te kumta ruh ka jaidbynriew Khasi ne Hynniewtrep ka don la ka jong ka sngi kha.

Ia kane, ngi tip ba ka dei ka sngi kha jong ka sha pyrthei kum ka jaidbynriew. Baroh shi katta, ngi la buhrieh khlem iathuh briew, ngi shu kun ha la ka mynsiem. Ngi la buhrieh tang hapoh ka kpoh kum ka buit shi kpoh ia ka sngi snem thymmai. Nangta ka iaisah tang ha ka jingmut khlem da sei shabar. Ha ka pyrthei baiar shajan ne sharud ka sha kiar Talawiar u Sohpet Bneng. Don ki jaidbynriew kiba pher rukom rukom. Ki jaidbynriew kiba jan eh bad ngi dei ka Surma Valley kaba hap mynta ha Bangladesh, la shong la sah tang da ki khar Bengalee suda. Kine ki leh burom ia kata ka Bengalee New Year’s day.

Kumjuh ruh shatei ha Brahma ha syndah jong u lum Kamakhya ki shong ki sah ki khar Asamia. Kine ruh ki don ia kata ka sngi kha jong ki kum ka jaidbynriew, kata ka Assamese New Year’s Day. Lada ngi phai pat sha ki lum Makashang jong u Mount Everest u jrong 8848 m. 29,029 phut u lum bajrong tam ha ka pyrthei. Une u don ha u syntai lum jong ka ri Nepal. Kine ruh ki jaidbynriew ki don ia kata ka Nepalese New Year’s Day ha ka shisien shisnem.
Baroh lai tylli na kitei ki sngi kha lai jaidbynriew, ki sdang kheiñ sngi snem thymmai ha u bnai Baishakh ne u April man ka snem. Hynrei ka sngikha jong baroh kitei ki New Year’s Day, ki iapher na kawei ka snem sha kawei pat. Balei ka leit jia kumta? Kane ka long, ba ki pynshong nongrim ia ka sngi kha jong ka jaidbynriew na u bnai bneng. Wat ki khar Masulman kiba bret lut ia ki kynja jingngeit biej bad lynthaw lut ia ki bleithaw kiba don ha ri Arabia mynhyndai. Hynrei kine ruh ki khein ia ka jingsdang ka jaidbynriew lyngba ka leh niam Id. Ka dei na ka sngi mih bnai bad ka kynriah na kawei ka snem sha kawei pat ba ki khein snem thymmai.
Ngi ki Khasi ngi kheiñ sngi kheiñ ïa ha ka thung ka tep, ka bet symbai u bnai ruh ngi khein na u bnai bneng. Tang shu la bakla thung bad pynhap symbai ruma ha ka rep ka riang, ki la bam khñiang lut bad u symbai u la shu sep ei. Kumta u Khasi u tip ia kaei ka por pyllun bnai bad kaei pat ka por mih bnai. Ngi don tang ka Oral Almanak ha ka jabieng. Ia kaei kaba ki kpa tymmen ki la thoh, ki la thoh, hynrei la kum nguid lut sha kpoh. Ha kata ka por mynba u ia jngi lang bad u dkhar ha kawei wah bah hyndai. U dkhar te u la teh ia kita ki kot jingthoh ha ka khlieh. Kumta kata ka kot kam shym jhieh.
Hynrei u Khasi, u la kbum pynban ia kata ka kot jingthoh dak ha ka shyntur bad kaba bun u la kum nguid noh sha snier hapoh jong ka kpoh. Kumta u Khasi u thep lut ia ki jingnang jingtip baroh lut sha snier tang sha kpoh. Kumta ngi sa ioh kynnoh ia u briew uba stad uba proh jingmut ba u la bam lut ia ka kot sha kpoh. Ngi ju ong ba u don ka buit shikpoh hynrei ngim ju ong pat ba u don buit shi jabieng. U Syiem Kyllong Raja jong ka Hima Malngiang hyndai ka hima kaba don ha West Jaintia Hills mynta. Ha kata ka por ka don ha Mo-kyndur hyndai. U ju leit sait ia ka snier lajong ba u sei na kpoh shisien shitaiew ha ka ’Wei Lakiang kaba don u pud ka Hima Jaintia hyndai bad Hima Khyrim mynta. Kata ka dei ka jingleh servicing ia la ka jong ka kpoh shisien shitaiew hakatei ka thwei. Nangta pat u sa suh pat hadien ba u la dep surgery hi da lade ialade. Um ju iathuh briew.
U Syiem Malngiang u long uba donbor tam uba ki marjan marpa kim ju lah ban pyndem thma ia u. La ki wan ki nongshun na Khyrim u jop ma u. La ki wan tur thma na ka Raid Jwai ruh kim lah. Namar u don ka bor barieh kaba kiwei kim tip. Ki Jwai ha kawei ka por ki la phah leit sha ka Iaw Daija da ka thei bhabriew jong ka Hima Malngiang. U Syiem u la iohi khmat ia kata ka samla kynthei bad u la iapmat ia ka. Kumta ruh la phah ki Jwai ban pah ban phon ia u ba hangno ka shong ka bor barieh jong u. Ma u ha kaba nyngkong um iathuh hynrei hadien slem slem, u la kum iathuh ia ka baieid ha kawei ka miet ha jingthiah ia kata ka bor jong u. U la ong ba ka bor baphylla jong u ka shong ha ki snier. Ka kylli ia u shano phi leit sei ia kita ki snier bad phi sait ia ki, u la iathuh ba u leit sait ha ka ’Wei Lakiang khappud bad ka Raid Mawshai jong ki Khyrim. Ka tang shu tip ka la leit iathuh sha Jwai. Kumta ki la leit thap sha kata ka jaka sum jong u, ki la iohi ba u sei ki snier lajong. Kumta ki la pom lyngkhot lyngkhai ïa ki snier jong u bad u Syiem Kyllong Raja jong ka Hima Malngiang u la iap noh. Duh artad ka Hima Malngiang junom. Hadien kata la mih pat sa artylli ki hima jong ki Syiem Sutnga na ‘Wai Khyrwi bad na ka krem Marai ha Rangkyndur, bad la mih ka Pahsyntiew na Krem Marai, ka Iawbei jong ki Syiem Shyllong.
Iwei i sahep bishar hadien ba la ioh Hill State Meghalaya ha ka snem 1972 dei I Rangbah Herman Nongrum. Hadien ine ila bat ia ka kyrdan kum u Registrar jong ka Guahati High Court, ka Shillong Bench ha Shillong haduh ba in da shongthait. Ine i Rangbah i la iathuh ba i Bahduh Nishan Wahlang (bam kwai ha dwar U Blei) i la kwah tip eh ia ka sngi New Year’s Day jong ka jaidbynriew ne ka sngi snem thymmai jong ka jaidbynriew. I la iathuh ia katei ka kyntien ha ka “Hall” jong ka Riti Academy of Visual Arts ha ka 23 tarik u Naiwieng 2018 ha Umsohsun Shillong. I la iathuh ba i Bahduh Nishan Wahlang (bam kwai ha dwar u Blei) baI kwah hir-hir ban tip kloi ia ka sngi New Year’s Day ka jaidbynriew. Te hynrei ka long kaba sngewsih ba haduh ba in da khlad noh na pyrthei,i Rangbah B.Nishan Wahlang,I Bah Herman Nongrum im shym lah banjubab.
I la iathuh iaka jingsngew wit mynsiem jong i ba im lah jubab jong i ha kaba iadon lang kiwei pat. Napdeng kiba don ha kata ka por ki long I kmie ki khun I Bah Nishan bad ki khun jong i. Kiwei ki ba la iohsngew ia kata ka kyntien I Rangbah Herman Nongrum, dei I Rangbah Bindo Mathew Lanong, Ex – Deputy Chief Minister ka Meghalaya, Rangbah Hispreaching Son Shylla, Chief Executive Member ka KHADC, kiwei kiwei de kiba iadon lang ryngkat bad une u nongthoh de.
Ka mynsiem ha kata ka por ka la pdang bad la sngew kum ban pait dohnud haba iohsngew ia kitei ki kyntien. Namar baroh baroh ngim shym lah ban ai jubab ia kata ka sngi snem thymmai u Khasi ne New Year’s Day mynba dang im 1 Bah Nishan. Kum ka jaidbynriew, ha kane ka por ngi la dei ban bah wait lyngngun haduh ban da lap ia ka sngi kha ka jaidbynriew. Hangno ka don bad ka rieh kata ka sngi kha jong ka jaidbynriew ne “National Day”, ban shad kmen da ka jingkmen lada la wan ka snem thymmai. Ban shu leh tynneng bad pyrthuh bud ia la jong ka pyrthei kata ha ka 1 tarik January man ka snem te ym sngew dei. Ka shu long tang kum ka rong ia pan ba ngi shu kam trai ia ka sngi kha jong kiwei pat ki jaidbynriew bad ki jait niam jong kiwei pat jong ka pyrthei.
Napdeng ki jaid Almanak jong ka pyrthei ki don ka Chinese Almanak, Muslim Almanak bad Jewish Almanak nalor kiba la ong haneng kum ka Assamese, Bengalee bad Nepali. Ka don ruh ka Julian Calendar jong u Julius Caesar u Patsha Rome hyndai. Sa kawei pat ka Almanak ka dei ka Gregorian Calendar jong u Pope Gregory XIII. Ka Julian Calendar ka don 355 sngi ha ka shi snem. Katba ka Gregorian Calendar, ka don 365 sngi shi snem. Shisien saw snem, ka don iaka Leap year ne (ka ryngkang sngi shisngi). Dei na kane ka daw ba sa don 29 sngi ha u bnai February shisien man ka saw snem. Ia u Prime Minister basaw jong ka India, u Morarji Desai la kha ha ka 29 tarik u February 1896. Kumta u ioh ban leh sngewbha sngikha tang shisien man ka saw snem. U Morarji Desai u long u Prime Minister ka India ha ka snem 1978 – 79.
Ha ka snem 1978, u la thmu ban hiar khyndew ha Upper Shillong Helipad ban wan sha Shillong. Hynrei u Pilot u la shem ha kata ka por ba katei ka Helipad, ka la tap bad la dum ngain da u lput ne u lyoh khyndew bad um imat iohi shuh. Kumta um nud ban pynhiar ia ka liengsuin hangtei. U la pynphai noh ia ka liengsuin sha ka Umroi Aerodrome. Hynrei ha kata ka por ym don VIP ban pdiang ia u ne Security ki pulit ban synran ia u. Ha kata ka por la don kawei ka Jeep Bhoi, da kaba jia ryngkhat ka don hapoh Airport. U la kren ia u driver ba un kit ia u ban wan sha Shillong. Kiwei kiba iadon lang ha kata ka por kim nud ong eiei. U la kiew joit da kata ka Jeep Bhoi bad poi haduh lad Umroi G.S.Road. La wan hiar bran bran ki pulit ban shimti ia u. U la ong ia ki ha kata ka por ba um don por ban pynsepei ia ka por wat tang shi minit ruh. Une u Morarjee Desai u la khlad noh ha u April 4, 1995.
Haba ia pher ka sngi khein New Year’s Day katkum ki Almanak bapher. Te la iapher ka sngi kha wat ia ujuh u briew katkum ki Almanak jong ki. U Rangbah Hispreaching Son Shylla, lyngba ka kot “Hynniew phew sngi u Daniel”. U la iathuh ba ka sngi kha jong u Trai Jisu Khrist ka dei ha ka 1 tarik u October 3 B.C. Ka Gregorian Calendar ka khein pat ba ka sngi kha U Trai Jisu Khrist ka dei ha ka 25 tarik u December man ka snem. Hynrei ki Khristan Orthodox kum ka Herzogovina Orthodox ha Balkan bad Russian Orthodox, kine pat ki khein sngi kha ia U Trai Jisu Khrist ha u January 6 tarik man ka snem. Iano yn ngeit? Ka Maria ka kmie U Jisu Khrist ka la kha tang shisien kha bad ym dei ba la kha lai sien ia U Jisu Khrist.
Kine ki kynrum kynram ki la mih hynrei yn leh shuh kumno. Kumta u Pope ba 226 jong ka Balang Roman Catholic, U Pope Gregory XIII u la sngew khia bad la kulmar jabieng haba pyrkhat ia kitei ki tarik. Une u Pope u dei u Pope jong ka Niam Khristan na ka Balang Roman Catholic. Une u la long u Pope naduh u bnai May 13 tarik (ne Jymmang) 1572 haduh 10 tarik u April (Iaiong) 1585. Kata ka mut u la long Pope jyn haduh 12 snem kynthih bad 332 sngi. Utei u Kpa Bakhuid Pope Gregory XIII Papa GREGORIUS Tertius, uba ka kyrteng Iawbei jong u ne ka kyrteng iing jong u ka dei u Ugo Boncompagni. La kha ia u ha ka shnong Bologna, Papal States ha South Europe hyndai.
Katkum ka Gregorian Calendar, ka sngi nyngkong jong ka,ka dei ha ka sngi Sunday. Ki Greek ki khot ia ka ka ka sngi Sunday kum ka sngi jong u blei Sngi Sunday. Ka sngi kaba ar ka dei ka Monday ne Moon day jong u BNAI ha ki Greek. Ka sngi kaba lai ka dei ka Tuesday, ka dei ka sngi jong u blei-thma. Wednesday ka dei ka sngi basaw, kata ka sngi ba hapdeng ne ka sngi pdeng – ia ne pdeng taiew. Ka sngi Thursday ka dei ka sngi basan jong u blei Thor jong ki. Ka sngi Friday, ka dei ka sngi ba hynriew, ka sngi burom jong ka blei Norse ha ki. Khatduh, ka sngi Saturday, ka dei ka sngi Sabbaton jong ki Jew, ba u kynrad u shongthait naduh ba U la thaw ia ka pyrthei. Ka dei ka sngi burom ia u met bneng Saturn. Ki Jew ki leit dwai ha Synagogue. Ki Khristan SeventhDay ki leit jingiaseng ha katei ka sngi. Tangba ki leit trei leit ktah leit iew leit hat ha ka sngi nyngkong Sunday.
Marshak ia kitei ki hynniew sngi jong ka Gregorian Calendar. Ngi shem pat katkum ka Khasi Almanak la ai kyrteng kum ka sngi U Blei ne sngi U Trai ne sngi Robibar ha ka sngi nyngkong. Ia ka sngi Monday ba-ar jong ka taiew ki la khot kyrteng pynban kum ka sngi nyngkong ne lah sngi u Blei. Ka Tuesday ka dei ka sngi balai, la pynkylla sha ka sngi ba-ar ne sngi Hatmajai. Ka sngi balai kata ka sngi Wednesday la khot ka sngi Balang ha ka jaka ka sngipdeng- ia ne pdeng taiew. Ia ka sngi Thursday la khot kum ka sngi Palei. Nangta ia ka sngi Friday ka sngi bahynriew la khot ka sngi Thohdieng. Mynta ka Sorkar ka la khang pom ne thoh dieng baroh shisnem. Hynrei ka Khasi Calendar pat haduh mynta ka dang phah pom dieng man la ka taiew. Katba ha ka sngi kaba hynñiew ba U Blei U la shongthait ba ong ki Jew. Ma ngi pat ngi leit saitjain shisien shi taiew.
Mynta kumba la ong haneng, ka Gregorian Calendar ka don hynniew sngi shi taiew. Hynrei katkum ka Hynniewtrep Almanak pat ka don haduh phra sngi shitaiew. Kata ngi sdang ia ka sngi Iewduh ha Shillong ha ka lew heh duh. Katba ha Jowai pat ki sdang ha ka sngi Iawmusiang bad ha Sohra pat ki sdang ha ka Iewbah. Kiwei pat ki sngi ter ter naduh ka sngi Lyngka haduh ka sngi iew Umni, ki dei ki sngi Poh-ia suda ha ka Hima Mylliem.
Ngi ju ong Ar-ia, kata ka mut ar sngi ar miet, Lait-ia ka mut lai sngi lai miet hadien ka jingiap briew lai sngi lai miet ha iing, ba ngi sa lah ban leit trei leit ktah shabar sha lait ban leit donkam. Nangta de, ngi ju ong Shi -Saw-ia, kaba mut saw sngi saw miet. Kumta lada addlang ne pynlang lang ia ka Saw-ia artylli. Ngi ioh ia ka shitaiew kaba mut phra sngi. Kumta saw taiew ha ngi ka long baroh 32 sngi shi bnai, katkum ka rukom khein sngi khein taiew u Khasi ha ka Hynniewtrep Almanak.
Hynrei haba la pyllun bnai bha lyur, ngi ju khot “U NAI KHADSAW SYNNIA”, ia u khun shynrang jongno jongno, uba tip iing tip sem, uba tip kur tip kha batip man, batip shnong batip thaw bad ba tip briew. Nangta u long ruh u bym kyrkieh ka leit iing briew, uba shong khynraw ha iing kur, uba iarap ia kiwei, uba kit ia ka pang ka jhia ha iing ha sem. Hynrei kim ju khot ia u pat u Nai Khadsan ne Khadhynriew Synnia. Hynrei ki kmie ki kpa bad u kni, kim ju shah ban shong iing kur sah. Kumta ki Pynbuh briew nohia utei u ’Nai Khadsaw Synnia (Bluemoon man) ban leit leh bha sa ia ka kur ka jait jong kiwei pat.

Ia uta uba ki khot u ’Nai Khadsaw Synnia uba dei u rang bhabriew jylluin lymphuin. Ki mut pat ba don 28 sngi shi bnai ha ka pyrkhat bnai jong ngi. Lada addlang ia ki 10 bnai ne ka 28 sngi ngi ioh ia ka 280 sngi bad ngi khein long 10 bnai. Katba ha ka Gregorian Calendar pat ki khein 9 bnai ne 270 sngi. Haba ngi shong 9 ne 10 bnai ha kpoh jong I mei, ngi sa lah ban shah kha ne wan long briew sha ka pyrthei na ka kpoh I mei. Haba I mei I la pun bad biang ka ia, la kha ia ngi sha pyrthei ha ka dur long shynrang ne kynthei katkum ka jingbynta ne ka mon U Blei Trai Kynrad. Ha kane ka rukom, sa iar u tnum tyndai bad ka jaid ka khong u Khasi ha ka pyrthei baiar.

Lada u kpa u iap ne khlad noh ha kine ki khyndai bnai ki shiphew bnai hapoh kpoh jong I mei, ngi dang lah ban wan long briew sha ka pyrthei. Ia kum kita ki khun ne khyllung ba kha pynim kpa la khot kum (Phosthumous child). Hynrei lada ka kmie bapun, ka pang ka tlot bad kam lait kha ia ita I khyllung. Lada ka iap noh ka kmie ki khun bapun ruh ki iap lang. Dei na kata ka daw ba ha ka kot ba donnam “Ki Sngi Barim u Hynniewtrep” ba la thoh da u Babu Soso Tham, u la ong ba “Ynda nga poi ha iing U Blei, Nyngkong ngan wad hangno I Mei”.

Kumta lada ngi ia khein ia ki Khadsaw Synnia, plus artylli ngi ioh ia ka 28 sngi 28 miet shi bnai. Hynrei lada ngi khein ia ki sngi iew phra sngi shitaiew. Ka mut pat ba saw taiew ngin ioh 32 sngi. Kumta lada 28 sngi u bnai bneng bad 32 sngi u bnai khyndew long shibnai ha ki ar jingkhein. Hapdeng kine ar, lada ngi ia nujor pdeng-ia ki kyllum lang kan poi sha ka 30 sngi shi bnai eiei. Nangta lada ngi khein28 sngi u bnai bneng bad 13 bnai shisnem u bnai Khasi (28×13). Te ngin ioh 364 sngi shisnem.

Shu buh noh ba lada u bnai bneng thymmai jong ki Khasi u dei ha ka taiew khatduh u October ne haduh shitengbnai tam byrshem bnai (October- November, ngin ioh 13 bnai shisnem; 1. Risaw – Byrshem – Naiwieng, 2. Naiwieng bad December long bnai baar, 3. Te u bnai balai jong ki Khasi u dei u bnai December – January ter ter haduh u bnai bakhatduh haduh u bnai Risaw ne October ban long u bnai ba Khatlai Bnai shisnem. U bnai Khasi u tyllun13 sien ia ka pyrthei ha ka shisnem.

Ka por synrai ka long kaba sngewtynnad tam ha ka Bri u Hynniewtrep. U slap u la kut bad la wai bad ka dait thah jong u thah kam pat lah ban dait thah. Te ka dei ka sngi sdang snem jong ka ri u Hynniewtrep talawiar U Sohpetbneng. Shu buh lada shuwa ban mih u bnai 20 sngi bad hadien 20 sngi ba la mih u bnai te dei ka por synrai. Te ngi ioh ia ka por synrai tang 40 sngi shisnem. Ha ka por synrai ki sla dieng, ki la byrtem rong na ka jingjymgam sha ka rong byrtem ba ka lyiur ka la phet. Ka tlang ka la pynkhreh ban wan.

Ha kane ka por la don ka jingkylla ha ka mariang ha ka ri jong ngi. Ngi shem ha kane ka por ia uwei u syntiew khlaw uba ki khot u “Kyllang SynraP” ha khlaw Kyllang ha trai jong u lum Kyllang u phuh bha itynnad. Une u lum Kyllang u jrong haduh 5684 feet na sla duriaw Bay of Bengal. Na kjat lum haduh khlieh lum u jrong 700 feet. Une u lum u don ha ka Hima Nongkhlaw ne (14-8) ha Mawnai. La tep ia u Kitdor Syiem (bam kwai ha dwar U Blei) Ex- Minister jong ka Meghalaya ha kane ka shnong.

Kumba bteng biang ia kitei ki saw samoi 1. Ka Por Synrai ba la ong haneng ka synrai ka don tang 40 sngi shisnem. 2. Ka Tlang mynshuwa ka don 100 sngi ha ka shisnem hangne. Kumta dang long bha u soh apple ha Mylliem, Upper Shillong haduh Nongrimmaw Laitumkhrah dang soh bha u apple ha ka ri jong ngi. Mynta pat ba ka la wan ka Global Warming ka jingkhriat ha kiteiki lai tylli ki shnong ka la hiar sha ka 90 sngi. Te u soh apple mynta u la duh jait noh ha Shillong.Kum ka jingkynmaw ki pipe um mynstep mynshuwa ki dang set um ba kylla thah. 3. Ka por Pyrem ka por lyer ka jrong 100 sngi bad 4. Ka por Lyiur ka long ka ba jrong tam bad ka long haduh 135 sngi shi snem. Kumta lada pynlang lang ia kitei ki saw samoi baroh ki long 365 sngi shi snem.

Ha ki por ba la leit noh ha ki snem 1950… ter ter 1960… eiei, une u nongthoh u dang dei tang u khynnah skul rit bad skul pdeng haduh High School. I kmie jong u I ju leit pynsah kai ia u sha la shnong sha Laitlyngkot. La ju leh ia kane man ka snem tang shu dep ki examine kut snem bad ioh result shuwa ka Khristmas. La sngew kmen ban ioh leit sah kai sha shnong trai. Katba dang ia iaid lynti na Sawlad Laitlyngkot lyngba ka ‘Permatlah sha Shiliangktieh haduh ban da poi ha La-tdoh (Lumthangding). I mei I ju batai ia ki kyrteng kynbat ba don ha lynti iaid. Uwei na kita u ba don harud lynti hajan Shiliangktieh, u dei u thied dieng jong ka Diengiei hyndai ba dang iai suh thied ha ki ‘dew ktieh ha Laitlyngkot.

Man ka miet ngi ju ia shongkai bad ki riewtymmen ban sngap kai ia ki khana bun jait na ki khana tymmen jong ki. Ki ong ba u bnai January ne Kyllalyngkot u dei u bnai “Uba lai” jong ka snem katkum ka Almanak Hynniewtrep. Lada shim ia kane ka parom ne khana tymmen, ka mut u bnai October – November (Risaw) – Byrshem bnai Naiwieng udei u bnai ba nyngkong ha ka Khasi katkum ka Hynniewtrep Almanak. Ki tymmen ki ju ong ba ha ka por tlang bnai January bad February ka dang khriat bha. Ha kine ki por ki ong ba ki dieng ki siej ki iohthiah bad kim san kim mer bad la sdang kynther la-iaw. Kumta lah ban pom dieng katba mon, katba ha kiwei pat ki shiphew bnai ym lah ban pom dieng kulmar. Te wat ha ka por tlang ruh dei ban pom tang ha ka por barit ne ngen u bnai ba u bnai u sdang ban bam khyndew.

Katkum ka jingkwah I Bahduh Nishan Wahlang (Kpa u Rafael Warjri). Sa nangta de ka jingkyntu I Rangbah Herman Nongrum ha ka 23 tarik u Naiwieng 2018 ban ia wad lem ia ka New Year’s Day u Hynniewtrep. Kumta la tyrwa ban ia tynrong lem ha kane ka liang. Te, ban iaid sha khmat, hap ruh ban kyrtiang dien ia ka snem 2018. La shem ba ha katei ka snem 2018 ha u bnai October-November u bnai bneng u la mih bnai ha ka 10 u November 2018. Kata kein ka sngi ka dei ka sngi sdang snem thymmai 2019 jong u Khasi katkum ka Hynniewtrep Almanac.

Kaba ar pat ha u bnai October Byrshem bnai November 2019, u Bnai Bneng un mih ha ka 28 tarik u October 2019. Kane ka mut ba ka shiteng synnia 12 baje 27 bad 28 tarik u October kan dei kasngi sdang snem thymmai 2020 jong ka Jaidbynriew. Kan dei shisha ka National Day jong u khun Hynniewtrep ha KHASI LAND.

Kaba lai pat lada ngi jam sha khmat sha ka snem 2021, ngi shem bau bnai bneng ha ka por synrai kataka mut ha u October – Byrshem bnai November 2020. U bnai bneng un mih bnai ha ka 15 tarik uNovember 2020. Kata ka mut ba ha ka 14-15 tarik u November 2020 ha ka por 12 baje shitengsynnia kan long pat ka sngi sdang snem thymmai 2021 jong ngi. Kumta kein ka 15 tarik u Novemberla shem snem sa shisien pat, kan long biang ka sngi snem thymmai u Khasi kat kum ka Hynniewtrep Almanak 2021.