Sngewsih ka KJP Synod ba khlad U Archbishop

Shillong: Ha ka jingiaseng iasyllok ki Pastor jong ka Khasi Jaintia Presbyterian Synod Mihngi kaba la long ha iingmane ka Balang Banuin naduh ka 18 tarik haduh ka 20 tarik u Risaw 2019 ka pynpaw ka jingsngewsih ha ka jingkhlad ba kyndit kynsan u Arch Bishop Dominic Jala jong ka Shillong Arch Diocese ka Balang Catholic ha ka jingia tyngkhuh kali myn ha ka 11 tarik u October 2019 ha ka ri America.

Ka KJP Synod Mihngi ka pynpaw ba u Arch Bishop Dominic Jala u la ai ka jingshakri kaba bha eh na ka bynta ka jingroi bad ka jingsan jong ka Balang Catholic ym tang ha kane ka jylla lane ha ka ri India jong ngi hynrei wat shabar ka ri ruh kumjuh.

Namarkata, ka jingkhlad ba kyndit jong u ka long ka jingduh kaba khraw ia ka imlang ka sahlang bad khamtam ia ki paid riewngeit ka Balang, ha kaba ka la duh noh ia u nongialam uba kongsan eh jong ka, hynrei ngi duwai ba u Blei ba un pynmihpli da uwei pat u briew jong u uba lah ban ai ka jingshakri kaba bha tam sha U bad sha ka Balang hi baroh kawei.

Ha kane ka por ka jingsngewlem, ki Pastor ka KJP Synod Mihngi ki lah phah ka jingsngewlem sha ki bahaiing u Dominic Jala bad sha ki riewngeit ka Shillong Arch Diocese, ryngkat bad ki jingduwai ba u Mynsiem u Blei un pyntngen ia ki bad ba ka mynsiem jong une u briew jong u Blei kan thiah suk ha ki kti badonbor jong u.