Kyntu ki MDC, ban thaw pisa ka KHADC

Shillong,25 Jylliew:
La iohi ba ka long kaba suk eh ia ki kom peni khamtam ki kom peni kiba na bar, ban pynkhraw ia ka kyrteng jong ki bad ban pyniaid iew ia ki mar jong ki hangne ha nongbah Shillong, kaba kim da donkam ban wad ia ki lad ki lynti kiba biang kumno kin pynbna ia ki jingpynbna jong ki, hynrei tang ka NOC na ka tnad Municipal ka la biang ia ki ban pynbna paidbah kylleng ka jylla da kaba tah ia ki dur ki dar bad ki Poster ha manla ki kynroh jong ka nongbah Shillong.
La wanrah ia ka mat ban ia kren halor katei ka phang ha Ing Dorbar ka KHADC kaba la long mynta ka sngi da u MDC ka Jaiaw u bah Adilbert Nongrum, ha kaba u la kdew ba kitei ki jait jingpynbna kiba la shu wah kat shaba mon ki dei kiba la ioh ia ka No-Objection Certificate na ka Municipal. La kyrshan ia katei ka jingong u bah Adilbert da u MDC ka Liangpyrshah uba dei ruh u MDC ka Sohra u bah Donevan Kharwanlang, ha kaba u bah Donevan u la ong ba kitei ki kompeni kiba pyndonkam ia ki kynroh ka sor Shillong ban pynkhriang ia ka khubor babha ki kompeni jong ki, ki la ioh tang ka jingbit na ka tnad PWD bad ka NOC pat ki la ioh na ka Municipal.
Kitei ki ar ngut ki MDC, ki la kyntu ia ka KHADC ba lada ka leh eiei, kan long ruh ka lad thaw pisa na ka bynta ka Council, da kaba shim khajna ne da kano kano rukom kaba lah ban pynmih pisa ia ka KHADC, bad khnang ba katei ka jingtah Poster kat shaba lap ha kito ki jaka ba hap hapoh ka jingpeit ka KHADC, kan long ruh ka jingmyntoi ia ka KHADC.
U bah Ardent Basaiawmoit , CEM ka KHADC haba pynshai halor katei ka mat ba ki ar ngut ki MDC ki la pynpaw hapoh Dorbar, u la ong ba ka KHADC ka dang bishar ia kane ka kam bad ka kam ka dang iaid shakhmat.