U Most Rev. Archbishop Dominic Jala: U Nongsharai Balang, U ‘Riewniam bad U Khraw Pyrkhat

• Dr. Sylvanus Lamare
  Ka step jong ka 12 tarik u Risaw, 2019 ka dei ka step kaba la pynkyndit, pyndukha mynsiem bad pynshahïong lut ïa baroh ki ‘riewngeit jong ka Balang Katholik ha Shillong, kiba ha ïing ha sem, ka Jylla Meghalaya, ki Jylla Shatei Lam Mihngi bad ha Ri India; namar ba la ïoh ka khubor kaba ym don ban poi pyrkhat, kata, ka jingkhlad noh u Most Rev. Dominic Jala, SDB, DD., u Archbishop ka Shillong bad u Apostolic Administrator jong ka Nongstoin. Ka jingtip kaba kham thikna ka la poi ba u Archbishop Dominic Jala, u la khlad ha shen ha ka jingïatyngkhuh kali kaba la jia ha ka surok ha California, Colussa County, Wilbur Spring ha ka por 2.20 janmiet jong ka 10 tarik u Risaw, 2019. Ka khubor ka la saphriang bad par stet haduh katta katta bad baroh kiba ïoh ïa kane ka khubor ki la kyndit bad shem shitom shibun ban pdiang. Wut wut la saphriang ki dur bad ki video lyngba ki social media halor jong u Archbishop Dominic Jala. Ki Nongïalam paidbah naduh na ka Sorkar Pdeng, kiba kynthup ïa u Myntri Rangbah duh ka Ri, u Narendra Modi; na ka Sorkar Jylla u Conrad K. Sangma, u Vincent H. Pala, u nongmihkhmat sha ka Lok Sabha bad kiwei ki nongïalam ki la kynmaw bad pynpaw ïa ka mynsiem sngewsih kaba jur bad ki la phah ïa ka khubor sngewlem halor ka jingduh kaba kyndit bad kaba khraw haduh katta katta.

Ha ka jingwad jingtip, ha i por iba lyngkot, la ïoh ban lum lang katto katne ki jingtip halor jong u Archbishop Dominic Jala, u Nongsharai Balang uba jar jar bad u Khraw pyrkhat u bym ju bun ktien. U Nongsharai Balang uba minot thop ha kaba leh ïa kiei kiei kiba bha tam na ka bynta ka Balang Katholik; u Khraw pyrkhat uba la kyntiew ïa la ka Jaitbynriew ha ka pyrkhat ka pyrdaiñ bad khamtam eh uba kloi ban leh kiei kiei kiba bha na ka bynta ki samla bad kito kiba donkam ïa jingai mynsiem jong u lyngba ka jingïaphylliew jingmut bad ka sneng ka kraw.

Na ki kot ki sla kiba la buh la shem ba ïa u Archbishop Dominic Jala, la kha ha ka 12 tarik u ‘Naitung, 1951 ha Mawlai Phudmuri. U dei u khun shynrang uba lai jong Babu Marius Leiñ Kharumnuid bad i Kong Maria Hina Jala Kharbhih (kiba la bam kwai ha dwar u Blei). Kum u khynnah u dei uba sngewtynnat ban pynlut por ha la ïing ryngkat bad la ki kmie ki kpa ban ïarap kam ïa ki bad ruh ban pynlut por ha kaba pule ki kot kiba ai jingtip. Nga nud ban ong ba u Archbishop Dominic Jala u long uba donbok bha ban ïoh u kpa kum u Babu Leiñ, uba la long u nonghikai ha Sacred Heart Boys’ L. P School bad ruh u Katekis jong ka Mawlai Parish naduh u ‘Naiwieng 1952. Une u rangbah u la long u nonghikai uba ‘riewblei, uba nang bha ban pynsngewthuh ïa ki khynnah, uba u nang bha ban biria dei por bad uba sngewthuh ïa ki khynnah. I Kong Maria Hina Jala Kharbhih pat i dei ka longkmie kaba ‘riewblei, kaba jai jai bad kaba bat ïa ka kyrdan longkmie ryngkat bad ka maiñ kaba pynphuh pynphieng ïa ka. Kumta, ha u Archbishop Dominic Jala, lah ban ïohi ïa ka sap hikai, ka sap biria dei por bad ka jingsngewthuh ïa ki briew khamtam ki samla kiba u la ïoh na la u kpa; ka jinglong rangbah bad ka maiñ kaba pynphuh pynphieng ïa u kaba u la ïoh na la ka kmie. Nalor kitei, u la ïoh ruh na ki ka jinghikai ban pynlut por ha ka jingdwai bad ka jingshakri ïa u Blei bad ïa la ki para briew.

Kum u khynnah, u Archbishop Dominic Jala, u la sdang ka jingshong skul ha Sacred Heart Girls’ School kata haduh class I. U la kynriah sha Sacred Heart Boys’ L. P. School na ka bynta ka klas II ha ka por ba long Headmaster u Phadar Albert Correngia. I Kong Gladys Margareth Warlarpih (89 snem ka rta) iba la hikai ïa u ha klas III i ong kumne, “u dei u khynnah uba stad, uba minot, uba tipsngi bad uba jai jai.” Kiwei ki nonghikai kiba la ïoh ban hikai ïa u ki long, i Kong Helo Pariat bad i Kong Christina Sun (kiba la bam kwai ha dwar u Blei). Ka jingïakynduh bad ki ‘Riewniam na Sacred Theological College, Mawlai ha kata kaba la tip kum ka “oratory” ka la phrung ha u Archbishop Dominic Jala ha ka por ba u dang khynnah ban thrang ban long u ‘Riewniam. Na Sacred Heart Boys’ u la leit sha Don Bosco Technical School, Laitumkhrah ban pule ïa ka klas V. Haba la plie ïa ka Savio Juniorate ha Mawlai ha ka snem 1961-62, u la leit rung ban pule hangta bad la pynkiew ar klas kata sha ka klas VII. I Kong Celina Jala Kharbhih iba ju ïaleit skul lang bad u haba ki dang rit, i ong, “Ka jingstad bad ka jingminot jong i ka la pynlong ba in ïoh kiew ar klas shi snem”. Ha Savio Juniorate, u la pyntbit ïa lade ha ka jingpule ban pynkhreh ban long u ‘Riewniam jong ka Jingïasyllok Salesian u Don Bosco; u la pyntbit ruh ha ka jingpule ïa ki sobjek kiba pher bad ha kiwei kiwei ki phang kum ha ka trei ka ktah bad ruh ha ka put ka tem.

U la pyntbit shuh shuh ha ka jingpule ban pynkhreh ban long u ‘Riewniam ha Sunny Side Upper Shillong bad u la shim ïa ka jingsmai kum u ‘Riewniam ha ka 24 tarik u Jymmang, 1969. Na Sunny Side u la leit ban pule Bachelor of Philosophy bad Bachelor of Arts sha Salesian College Sonada, Darjeeling. U la pyndep ïa ka B. A. Honours ha ka English literature bad u la ïoh khur ruh ïa ka Takma Ksiar ha kata ka sobjek bad hadien pat u la pyndep sa ïa ka M. A., na Pune University. U la trei kum u nonghikai ha Don Bosco School, Tura naduh ka 1 tarik u ‘Naitung, 1972 haduh 25 tarik u Jymmang, 1974. Kat kum ka jingkren kaba la ai da u James Sangma, u Minister ka Sorkar Meghalaya ha ka 15 tarik u Risaw, 2019, u la ong, “Dei ha ka snem 1973 ba u Brother Dominic Jala u la pynbit pynbiang bad pynïaid ïa ka choir na ka bynta ka jingïathoh shongkurim jong i pa jong nga u Purno Sangma ha Tura”. Na Tura, u la leit ban pyndep ïa ka jingpule Theology sha Kristu Jyoti College Bangalore naduh ka snem 1974 haduh ka snem 1977. Hadien ka jingpule Theology, la pynkyntang Deacon ïa u bad hadien pat la pynkyntang Lyngdoh Sohblei ïa u ha ka 19 tarik u ‘Naiwieng 1977 ha Mawlai Parish. Hadien ba la pynkyntang Lyngdoh Sohblei ïa u, u la leit hikai ha Don Bosco Technical School Maligaon haduh ka 20 tarik u ‘Naitung, 1980. Na Maligaon, u la leit pyntbit ïa lade sha Rome bad u la don ha Testaccio Rome haduh ka 1 tarik u ‘Nailur, 1985. Hadien ka jingpule na Rome, u la wan phai sha India bad long u Professor jong ka Liturgy bad kiwei ki sobjek ha Sacred Heart Theological College, Mawlai haduh ka 1 tarik u Kyllalyngkot, 1989. U la shimti kum u Rector jong ka St. Anthony’s College naduh ka 22 tarik u Rymphang 1989 haduh ka 29 tarik u ‘Nailar, 1990. Dei ha ka por ba u dang bat kum u Rector jong ka St. Anthony’s College ba la pynlong ïa ka jingïakynduh ki khynnah samla jong ki skul Don Bosco na kylleng ka Ri India kaba la neh hynriew sngi lynter. La thung ïa u kum u Vice Provincial jong ka Guwahati Province bad ruh u Rector jong ka Provincial House, Guwahati ha ka 28 tarik u ‘Nailar, 1990 bad u la bat ïa kane ka kam haduh ka 5 tarik u Jylliew, 1993. Dei ha kane ka por, ba u la shim khia bad pynshlur ïa ka Catholic Authors’ Guild ban pynlong ka Symposium bad ban kynmaw ïa ka Lyngkhuh Snem kaba Arphew San Snem ka jingkhlad noh jong u Phadar Hopewell Elias. U Fr. Barnes L. Mawrie u thoh kumne, “Ka jingsngewnguh bakyrpang ka leit sha i Archbishop Dominic Jala, iba la long i nongpynbeit bad nongpynïaid ïa katei ka Symposium ha ka 28 tarik October, 1991 bad iba la ai jingbit ïa ngi ban pynmih ïa kine ki artikel ha kane ka thup”. Dei ma u ruh uba la bah khlieh lut ïa ka jinglut ka jingsep na ka bynta kata ka Symposium bad ka jingrakhe ka la long kaba jop. Dei kata ka jingrakhe pat kaba la ktik jingmut ïa ki ‘riewwad jingtip ba kin tih bad wad halor ki jingthoh u Phadar Hopewell Elias Khariong. U la shimti kum u Rector jong ka Don Bosco Technical School Shillong ha ka 5 tarik u Jylliew, 1993 haduh ka 24 tarik u Kyllalyngkot 1996. Ha ka por ba u la long u Rector ha Don Bosco, Shillong ryngkat bad kiwei pat ki Phadar bad ki Brother ki la shim bynta ha ka rwai ka siaw ha ka jingpynmih pisa kaba la pynlong da ka SBUK ha State Central Library, Shillong. Dei ha kata ka sngi ba la paw pyrthei kawei ka sap ka phong kaba u don kata, kum u nongtem uba tbit bha. U la shim khia ruh ban ribais bad ban nang pynbha ïa ka dictionary ba la thoh da u Msgr. E. Bars.

Ha ka 24 tarik u Kyllalyngkot, 1996 u la shimti kum u Provincial jong ka Seng Salesian u Don Bosco Guwahati bad u dei u Khasi uba nyngkong uba la ïoh bat ïa kane ka kyrdan. Dei ha kita ki snem ba la wanrah ki jingkylla ha ki rukom trei kam na ka bynta ka jingmyntoi ki samla da kaba plie ki tnat jingpule ki ban plie lad plie lynti ba kin ïoh kam ïoh jam kham kloi. Ka la don ruh ka jingïasnoh kti lang bad kiwei pat ki seng kiba trei ha kaba kyntiew ïa ki khynnah samla; kawei na kita ka dei ka YMCA kaba la sdang ka jinghikai komputer bad kiwei ki tnat pule. U Bah D. L. Warjri u la ong, “I Archbishop i long u briew uba kloi ban ai jingmut bad uba kloi ban ïarap ruh kumta ka la don ka jingïatrei kaba jan bha hapdeng ka YMCA bad ka Bosco Reachout”. U la ong ruh ba um kynmaw shuh ïa ka tarik, “dei ha ka por ba ngi dang ïabam ja sngi lang bad i Archbishop ha Don Bosco ba katto katne ki Phadar kiba la wan ban khublei ïa i bad ban ai ka khubor ba i la shah thung kum u Archbishop ka Shillong”. La jied bad pynbna ïa u kum Archbishop ka Shillong ha ka 22 tarik, Nohprah 1999. Dei ha ka 2 tarik u Ïaïong ba la pynkyntang Bishop ïa u ha Phylla ka Ïing Mane Bah ha Laitumkhrah. Ka dei ka sngi ka ban sah kynmaw na ka bynta ka jingleh ïa ka niam ka rukom kaba i shongkun shibun ryngkat bad ka kynhoi ka risa. Ïa kata ka jingleh niam ha kata ka por, la pynïaid bad pynbit pynbiang da u Dr. Phadar Sylvanus Sngi Lyngdoh uba la pynwan dur ban ïadei bad ka kolshor jong ka bri u Hynñiew Trep u Hynñiew Skum.

Kum u Archbishop jong ka Jylla Niam Bah Shillong u la don bynta ha kiba bun ki kam kiba ïadei bad ka Balang ha ka Shatei Lam Mihngi bad ruh ha Ri India ha Conference of Catholic Bishops of India. Ka jingtbit bad ka jingshemphang jong u halor ka Liturgy ka la pynlong ba un shah jied kum u Member Secretary jong ka International Commission on English for Liturgy. U la mih khmat bad shim bynta ha ki bynta kaba pher bad ha kylleng ka pyrthei ha ka jingïaphylliew jingmut kumno ban pynbit pynbiang ïa ka Liturgy kaba dei ka bynta kaba kongsan ha ka niam ka rukom jong ka Balang Katholik. U la long ruh u dkhot jong ka Congregation for Divine Worship and the Discipline of the Sacraments (Congregatio de Cultu Divino et Disciplina Sacramentorum). U la shimti kum u Chairman jong ka North East India Regional Bishop’s Conference (NEIRBC) naduh ka snem 2012 haduh u Nailur jong ka snem 2019. U la bat ruh kum u Chairman jong ka Liturgical Commission jong ka Conference of the Catholic Bishops ha India la bun sien. Ka jinglah jong u ban trei ki kam kiba kyntiew ha kaba ïadei bad ka Balang ha Rome bad ha kajuh ka por ban shakri ïa ki paid ‘riewngeit jong ka Archdiocese ka long ka jingjop ka ban pynsah kynmaw junom.

U Archbishop Dominic Jala u dei uba kloi ban ai jingtip ïa ki ‘riewwad jingtip bad da lade nga la shem ba u kloi wat ban pynthied ki kot kiba ïadei bad ka sobjek kaba ngi wad bad haba ym ïoh ha India u ïaleh shitom ban pynïoh haba u leit shabar Ri. U dei u nongai jingmut uba tbit bad u da kdew ka lynti kaba beit bad kaba suk ban poi sha ka thong. Na ka bynta kiba wad ïa ka sneng ka kraw, u long uba kloi ban ai ki ‘tien sneng ki ‘tien kraw kiba shai, kiba kyntiew bad kiba ai mynsiem. Kum u khun jong u Don Bosco, u ieit ïa ki khynnah samla bad kwah ba kin ïoh kaba bha tam ha ka jingim ka jong ki ha ka jingïadei ka met bad ka mynsiem. Ha kine ki sngi haba la kynrei ka jingdih drok bad ba bun ki khynnah samla ki la ngat ha u, u Archbishop da lade bad da kaba ïakren bad ki bor Sorkar u la wad ki lad ki lynti kumno ban pyllait ïa ki khynnah samla na une u jingdih uba pynjot ïa ka lawei jong ki, ka ïing ka sem, ka imlang sahlang bad ka jaitbynriew. U Br. Dr. Albert L. Dkhar, u ïathuh, “u Archbishop u la sngew diaw bha haba ka Meghalaya Board of School Education ka shim ka rai ba lada ki khynnah ki pheil jingkheiñ kam lei lei.” La ïathuh ruh ba u Archbishop u da thrang naduh mynsiem ba ka Sorkar ka dei ban pynkylla ïa kata ka rai namar khlem ka jingkheiñ ka long kaba eh ïa ka lawei jong ki samla. U Archbishop, kumba la ïathuh da u Br. Dr. Albert L. Dkhar, u dei u dkhot jong ka Governing Body ka St. Anthony’s College palat arphewsan snem. Ha ki jingïalang, u dei u nongkdew lynti uba tbit bad u ai jingmut hadien ba u la sngap ïa ka jingai jingmut jong baroh. U dei u Nongïalam u pyrkhing bha bad uba bishar bin pa bin shwa ban ai ka rai. Ïa kaba dei ban pynpaw bad ban kren, u kren da kaba jai jai hynrei bad ka rai kaba skhem. Ha khmat jong u Archbishop Dominic Jala, ym don uba khraw ne uba rit, u ‘riewspah ne u duk; u pdiang lut ïa baroh da ki ksang kti kiba kloi ban pyntngen bad ka khmat kaba phuh samrkhie. Ki khynnah ki ïoh ka jaka kaba kyrpang ha ka jingim jong u, ha ki u long u paralok uba plie ïa ka phang jingïaphylliew jingmut bad jingïakren. U kmen bha haba u ïohi ba ki khynnah samla, khamtam na nongkyndong ki kiew bad wan sha khmat.

U Archbishop Dominic Jala, u la ngam jylliew bha ha ka ktien Khasi bad u kwah ba kane ka ktien kan kiew ym tang ha ka thoh ka pule hynrei wat ha ka jingpyndonkam ha ka niam ka rukom jong ka Balang Katholik. U dei u briew uba ieit ïa ki nongthoh bad u sngewtynnat bha ban pule ïa ki kot kiba pher. Ha kano kano ka lympung jingïaphylliew jingmut, u long uba shah skhor bad uba ai jingmut ban tei bad ban pynbha. U long uba kloi ban pdiang bad ban ïakren bad ki kynhun Balang Khristan kiba pher, kiwei pat ki jait niam ban ïatrei lang bad ki na ka bynta ka imlang ka sahlang. Ha u, ka jingïakren bad ka jingïaphylliew jingmut ka dei ka lynti sha ka jingïashong suk shong saiñ bad ka jingsngewthuh jingmut.

Kum u briew uba pule bad uba wad jingtip kaba bniah, u Archbishop Dominic Jala u dei uba tbit bha ha ka Latin, Italian, German, French, Spanish, Garo, Hindi, Greek, Hebrew bad English. U Archbishop, u dei ruh u briew uba pynlut por ha ka jingdwai bad ka jingpule ïa ka Ktien jong U Blei. U la minot thop ha ka jingpynwan dur ïa ka jingpyndon kam ïa ka ktien English bad ka ktien Khasi ha ka jingshakri ïa u Blei. Ki kam kiba u la leh ha kaba ïadei bad ka Liturgy ki dei ki matti ki ban sah bad ngi shi junom.

Na ka bynta ki hynmen ki para, ki pyrsa bad ki kur ki kha u dei uba kloi ban sngap bad ban ïadon ryngkat ha ka sngewbha sngewmiat bad kham tam eh ha ka pang ka shitom ban tynrong lem ïa ki jingkhuslai jong ki. Ha u, ka lynti sha ka jingïajan bad sha ka jingsngewthuh ïa ka mon u Blei ka dei lyngba ka jingdwai. Ka jingkhlad kaba kyndit ka dei ka jingduh kaba khraw ym tang ïa kiba ïatrei ryngkat bad u ha Ïing Bishop, ki ‘Riewniam, ki hynmen ki para, ki pyrsa bad ki kur ki kha, hynrei kham tam eh ïa ka baroh ki ‘riewngeit jong ka Balang Katholik ka Shillong Archdiocese bad ka Jylla Meghalaya baroh kawei. Ka Shatei Lam Mihngi bad kiba bun ha Ri India ki ïaïam briew ryngkat bad ngi ki khun u Hynñiew Trep Hynñiew Skum. Ka dei ka jingduh kaba jia kyndit bad kaba eh ban pdiang. Ngi la duh u Nongsharai bad ngi shaniah ba u Blei Un btin lynti bad Un pynshai da kumno ban pyndap ïa kane ka jingsuda. To U Blei bad Un ai ka jingjah thait bym ju kut ïa ka mynsiem jong u Archbishop Dominic Jala. Ïa ngi pat ka jingkyrmen bad ka jingsuk mynsiem ba ngin pyrto bad kynmaw ieit bad kynmaw burom ïa ki kam kiba u la leh ba ki matti kiba u la buh kin pynmih ki soh kiba tei ïa ka Balang bad ïa ka Ri bad ka Jaitbynriew.

(U Dr. Sylvanus Lamare, u dei uba la shah hikai ha u Archbishop Dominic Jala, uba ju ïasyllok bad u ha ki bun ki bynta kiba ïadei bad ka thoh ka pule, ki kam ki jam bad kiwei ki bynta ka jingim).

Ki Par Jingtip:

1. Na u Secretary, Provincial, Shillong Province.
2. Na kiba ha ïing ha sem.
3. Na i Kong Gladys Margareth Warlarpih.
4. Na ki Rangbah kiba la ïakynduh kam bad u Archbishop Dominic Jala.
5. Na ka programme ba la pynlong ha ka 15 tarik u Risaw, 2019 ha St. Anthony’s College bad kiwei pat.
6. Na ki khubor English bad Khasi.
7. Na St. Dominic Savio Church Mawlai Parish Platinum Jubilee Celebration 1939-2014, Souvenir.
8. Na ka jingïakren bad ki ‘Riewniam.
9. Dr. Barnes L. Mawrie (Ed.), U Khlur ka Ri Khasi-Jaiñtia, 2007.
10. Fr. Hopewell Elias SDB 25th Death Anniversary, 18th October, 1991.