Shillong: Ka rai ka Khasi Hills Autonomous District Council (KHADC) ban khang pyrshah ia ka jingpyndonkam ia ka plastik ha ka iew kaba heh tam ha Meghalaya, ha Iewduh ka la ai mynsiem watla ka la long tang shi bnai eiei ka la iaid mynta.
Kane ka long hadien shi bnai ba la iaid ka jingpyntreikam ban khang pyndonkam ia ki plastik , bad katkum ka jingong u U Executive member (EM) ka KHADC ba peit ia ka iew, u bah Jambor War , ka long kaba jop watla ka dei ka jingsdang.
Ka Khasi Hills Autonomous District Council (KHADC) ryngkat ka Hima Mylliem ka la pynjari ia ka jingkhang pyndonkam plastik naduh ka 2 tarik Nailur ba la dep bad ia kane ka rai la pyniar shuh sha iewbah ha Sohra.
U bah Jambor haba kren myn hynnin ka sngi, u la kam ba ka jingpyndonkam plastik ha Iewduh ka la hiar sha ka 60-70 percent eiei bad kane ka urlong kam namar ba ka dei lyngba ka jingiatreilang ki paidbah.
“Haduh mynta ka jingduna kiba pyndonkam plastik ha Iewduh ka la kot sha ka 60-70 percent bad ka la dei ka jingai mynsiem watla ngim pat lah ban khang pura’, la ong u bah Jambor.
U la ong ba watla kam pat long kaba jop pura hynrei la khmih lynti ba nangne shakhmat ki paidbah kin bteng ban ai ka jingiatreilang ban pynlong kaba jop pura ha kaba ym donkam plastik shuh ha iewduh bad ha kiwei ki iew ha kane ka ri Khasi.
U bah Jambor u la iathuh ba katkum ka kaiphod ba la ioh na ka Supervisory Team ba la buh ban peit bad talasi ia kiba pyndonkam plastik, kam don kano kano ka jingpynkhein na ki nongshong dukan ha Iewduh hapoh kine ki shi bnai tam.
Ka KHADC ka la sdang ban pyntreikam ia ka jingkhang ban pyndonkam plastik naduh ka 2 tarik Nailur ba la dep bad ka la long shi bnai eiei mynta. Ym tang ha Iewduh, kane ka rai la pyniar ruh sha ka iewbah Sohra bad ka kwah ban pyntreikam ha baroh ki iew ha kane ka ri Khasi.
Halor ka jingwan ki plastik lyngba ki jingsong na ki kompeni kum ki chip, ki jingbam bad kiwei, u bah Jambor u la ong ba ka Council kan sa shong ban pyrkhat ha kano ka rukom yn lah ban leh ia kane khnang ban pynsangeh syndon ia ki plastik.
U la ong ba ka long ruh kaba ioh mynsiem ha kaba ki shnong ki thaw ruh kila shim ia ki sien jam ban khang ia ki plastik ha kylleng ka ri Khasi.
Phi don ban ong eiei?