Ka Garo Hills, kan hap ha ka Disturb Area? Kynthoh U Mukul, hadien ka jingialang Cabinet

Shillong, 19 Jylliew:
Ka la mih ka jing kyl li, la ka sorkar kan pynbna kum ka disturb area ia ka thain Garo Hills namar ka jingkynrei ki kam pyn triem jong ki lehnoh.
Na ka liang u Myntri Rangbah ka jylla u Mukul Sangma u la ong mynta ka sngi Balang, hadien ba la wai ka jingialang cabinet ba ka sorkar kan bishar bniah kan eksamin ia ki katto katne ki jaka kiba hap ha ki san tylli ki district ha Garo Hills bad katto katne ha South bad West Khasi Hills shwa ban pynhap ne em kum ki disturb area, namar ka jingkynrei ki kam lehnoh bad ki kam pyntriem.
U Mukul u la ong ba ia mynta ym pat pyrkhat eiei halor kane, hynrei ka sorkar ka dang peit shwa kaei kaba dei ban leh ban iakhun pyrshah ia ki kam pyntriem.
Lada ka sorkar kan pynbna kum ka disturb area, ka mut ba ka thain kan hap ha ka jingtreikam jong ki bor laitluid jong ki shipai.
U Sangma u la ong ba ki kam jong ki riew pyntriem ki kynrei bha ha ki san tylli ki district ka Garo Hills bad ha ki katto katne ki bynta jong ka West Khasi hills bad ka South West Khasi hills district. U sngew ba ki seng pyntriem ki la shim kabu ia katei ka thain namar ka jingdon ki khlaw ki btap kiba rben bad ki jaka ba shem shitom ban iaid ban ieng khamtam ha ki bynta jong ka East Garo hills bad ka South Garo hills district. Bun ki nongialam ba hakhmat ki seng lehnoh ki shong riehtngen ha katei ka thain.
U Myntri Rangbah u la ong ba ka jingmih ki seng lehnoh ka dei ka mat kaba jwat bha ban wad ia ka daw tynrai bad donkam ban iakhun da baroh pyrshah ia kane ka jingeh khamtam ki jylla jong ka thain shatei lammihngi ka India ryngkat ka sorkar pdeng.
U la ong ruh ba ki seng lehnoh ba kham heh kum ka NSCN, ULFA NDFB ki don ka jingiadei bad ki kynhun lehnoh jong kane ka thain ha kaba ki la ai jinghikai ia ki. Ka ULFA bad ka GNLA ki hikai lang ban pyntbit ia ki dkhot jongkai. U la ong ba baroh ki jingtip la ioh da ka sorkar halor kane kynthup ka sorkar Assam bad ka sorkar pdeng.
U la ong ba ka jingialeh jong ki pulit ban kyndang ia ki kam pyntriem kam long kaba sepei bad bunsien ki la ioh ban kem bad ban kurup ia ki tiar siat jong kine ki lehnoh nalor ka jingshalan ia ki tiar siat. U la ong ba donkam palat ia ka jingiatreilang hapdeng ki jylla ka thain ban tehlakam ia kane kam lehnoh.