Shillong: Ki nongtrei ka Meghalaya EMRI Workers Union (MEMRIWU) ki la byrthen ba ki lah ban iakhih da kaba shah thngan syndon lada ka sorkar jylla ka iai mynthi ia ki jingdawa jongki.
Ka jingiakhih jongki ka la sdang naduh ka 30 tarik Nailur ba la dep bad ka la iaid haduh mynta ka sngi.
Kine ki nongtrei kila iashong miet bad sngi ha ïing dara ba ki shna ha phyllaw ka kompeni GVK EMRI 108 ha Lawmali, Shillong.
U president ka seng u bah Roipar Kharraswai u la ong ba sngew lyngngoh ba ka sorkar ka la niat sha ka kompeni ban pynbeit ia kane ka kam watla ka dei ma ka, kaba ai pisa ha kaba ka kompeni lei ka dei tang ka nongpyniaid.
“Lada ka sorkar ka dang iai mynti, ngim banse ban iakhih ruh da kaba shah thngan”, la ong u bah Roipar.
U la ong ba jingiakhih ka la wanrah ka jingduh nong shibun ia ki paidbah, ia kiba iakhih hynrei kaba ioh nong ka dei beit tang ka kompeni kaba la pyntreikam da ka nongrim ba khlem trei khlem ioh bai nong.
U la ong ba ha ka jingshisha ka la don ka jingiapynbeit ha ka jingialang ba la don lang u myntri sorkar mynshwa ba ka kompeni ka dei ban pynneh ia kaba ju long ban nym ot ia ka jingsiew ha kaba u myntri ula ong ban iaklet ia kaba la dep ha ka por ba iakynduh hynrei ka bor pyniaid kam sngap bad ka ot beit.
“Ka jingiakhih kan nang iaid bad ka jingiakhih ka lah ban long sha ka jingiakhih shah thngan. Na ka liang ma ngi ngin nym ailad ia ka bor pyniaid ban thom bor”, la ong u bah Roipar.
Ha kajuh ka por, ka kong Susan Lyngdoh kaba dei ka secretary ka la pynpaw ka jingsngew nguh ia ki paidbah ki sengbhalang kiba la wan ban iarap lem ia ki da kaba noh synniang da u khaw, ka lyer shet ha kine ki sngi ba ki la iashong iakhih ha katei ka jaka.
Ka la pynpaw ia ka jingsngew bynniaw ia ka jingleh mynthi ka sorkar haduh kine ki sngi.
“Ka jingiakhih ka la poi sha ka sngi ba shiphew hynrei na ka liang ka sorkar jylla kam shym ai kano kano ka jubab”, ka la ong.
Ka la ong ba ka la don shibun ki jingeh haba iasah ha katei ka ïing dara namar ba la shu iasah katba long.
“Ngi sngew synei ba ka la ktah ia ki paidbah naduh ba la sangeh ban treikam. Kyrpad ba ka sorkar kan leh kloi ban pynbeit ia kane ka jingeh namar ba ki paidbah ki iakynduh jingeh khamtam kiba duk kiba shitom”, ka la ong bad bynrap, “Ka kompeni kam siew ruh ia ka jingtrei palat ne overtime”,.
Ka la kyrpad ia ka sorkar ba kan sngap ia ki jingdawa jong ki ban pyndep noh hynrei lada ka sorkar kam sngap ka jingiakhih kan long beit khlem buh por.
Ka la ong ba ka kompeni ka dei ban mih noh na kane ka jylla bad ka sorkar ka dei ban shimti ban pyniaid hi ia kane ka kam kumba ka la leh ia kiwei.
Kumba 200 duna eiei ki nongtrei ha kane ka kompeni kila iakhih khlem pud da kaba iashong ha phyllaw ka ophis ka GVK EMRI ha Lawmali, Shillong da kaba shna da ki ïing dara.
Ki nongialam sengbhalang, ki politishian kila leit ban ai mynsiem ia ki nongtrei ka GVK EMRI 108 kiba dang iakhih mynta ha phyllaw ka ophis jong kane ka kompeni ha Lawmali.
U nongialam ka UDP u bah Egenstar Kurkalang, u MLA ka KHNAM na North Shillong bah Adelbert Nongrum, ki sengbhalang kila la leit ban ai jingkyrshan ia ki nongtrei ka GVK EMRI 108 kiba iakhih ha phyllaw katei ka jaka.
Phi don ban ong eiei?