Jurip ka FKJGP ia ka Umling Block, bym don Accountant

Nongpoh, 19 Jylliew:
Ka jingbym don u Accountant ha Umling C & RD Block ka la pynlong ia ka jingsahkut ki kam pynroi ha katei ka ophis jong ka sorkar jylla ha kine ki bnai bad ki snem ba la leit noh, la kynnoh u Bah G Tangsang, president ka FKJGP Umling Circle mynta ka sngi.
Ha kaba iadei bad kane ka jingbym don ia utei u Accountant, na ka liang ka FKJGP ruh hynne ka sngi ka la pynlong ia ka jingjurip ban lap ia ka daw balei ka sorkar jylla kam shym la lah satia ban thung briew ia katei ka kam kaba la pyndkoh ia shibun ki kam pynroi khamtam ba katei ka ophis ka long ka jaka treikam ban wanrah ia ki kam pynroi sha ki shnong ki thaw lyngba bun tylli ki jait skhim kiba ka sorkar jylla bad naduh ka sorkar kmie ki ju ai sha ki paidbah ka thaiñ.
Haba la ioh iakren bad u Bah G Marboh, BDO katei ka ophis treikam paidbah, u Bah Tangsang u la ong ba utei u ophisar u la kular ban iakren ia kane ka kam sahteng sha ka Deputy Commissioner ka district khnang ba kan lah ban shimkhia halor kane ka kam ban thung noh ia ki briew kiba biang ban shimti ia katei ka kam ba lait kat haduh mynta.
Ha ka jingwad ia ki jingshisha la lap ruh ba ym tang ia ka kam Accountant hynrei wat ia ka kam Assistant Engineer ruh katei ka ophis kam shym la don haduh kine ki sngi, kumta na ka liang ka FKJGP ka kyrpad ia ka DC bad ia ka sorkar jylla ba kan phai khmat sha katei ka ophis jong u BDO ka Umling ban thung noh ia ki briew ki ban trei ia kitei ki kam khnang ba kan long ka jingmyntoi ia ki shnong ki thaw ha kaba iadei bad ki kam pynroi kiba katei ka ophis ka ju iarap man la ka por sha ki paidbah.
Ha katei ka jingleit wad ia ki jingshisha, nalor u Bah G Tangsang, la don ruh u Bah L Mawnai, president ka Byrnihat Circle bad u dkhot ka Central Body bad kiwei kiwei ki dkhot ka seng.