T.14hajar klur, ka pisa ki nong India ha ki Bank ha Swiss

New Delhi, 19 Jylliew:
Ka don ka pisa jong ki nong India, kaba don ha ki Bank ha Switzerland, kaba poi sha ka 2 billion Swiss francs (lane kaba long T.14,000 klur).
Ka jingbuh pisa jong ki nong India, ha ki Bank ha Switzerland, ka kiew da 40% ha u snem 2013, na kaba ju don 1.42 billion Swiss francs ha shwa jong utei u snem bad katei ka dei katba kum ka jing tip, kaba la ai da ka Swiss National Bank (SNB). Katei ka dei ha ka por ba ka jingbuh pisa jong kiwei pat ki briew kiba nabar ri, ka la nang hiar shibun ha ki Bank ha Swiss, kaba la hiar sha ka 1.32 trillion Swiss francs (lane kaba long $1.56 trillion lane kaba long T.90 lakh klur) ha kaba kut jong u snem 2013.
Ha u snem 2012, ka jingdon pisa jong ki nong India ha Swiss Bank, ka hiar da shi bynta na ka lai bynta bad ha katei ka por, ka jingdon pisa, ka long 1.95 billion Swiss francs, ha kaba la don da ki riew shimet bad nangta sa 77.3 million Swiss francs, ha kaba la bat da ki riew pdeng jong ki heh spah, katba kum ka jingkhein jong u snem 2013.
Ka India, ka dang pynbor mynta ia ka Switzerland, ba kan ai jingtip, ia kito kiba don pisa bad ki Bank jongka ha Switzerland, wat la katei ka Ri, ka pynpaw ia ka jingsngew pyrshah jongka, halor katei ka jingthmu jong kiba bun ki Ri.