Pyrshah jur, halor ka jingthmu ka Star Cement ban pynheh ia ka par tih mawshun

Shillong: Halor ka jingthmu jong ka Star Cement Pvt. Ltd ban pynlong ïa ka jingpynsngew paidbah ha ka 19 tarik u Risaw 2019 ha shnong Brichyrnot ban khlong ïa u mawshun na kawei ka par mawshun kaba don ha shnong Brichyrnot, ka United Hynniewtrep Movement (East Jaintia Hills Districts)ha ka shithi ba la phah sha u Chairman jong ka Meghalaya State Pollution Control Board (MSPCB) ba la soi kyrteng da u Yoomeki Kyndait, President UHM-EJHD bad u Rimi Dkhar, Secretary UHM-EJHD ki la pynpaw ka jingpyrshah halor ka jingthmu ka Star Cement ban khlong ïa u mawshun na ka par kaba don ha shnong Brichyrnot kaba hap ha ka Elaka Narpuh East jaintia Hills District.

Katkum ka shithi, kine ki nongialam ka Seng ki la ong, lada ailad ïa ka Kompeni ba kan khlong ïa u mawshun kan don ka jingshah ktah ïa ki khlaw kiba don ha ki thaiñ Narpuh bad kumjuh ruh ïa ka wah Lukha kaba don ha Sonapyrdi, kan don ruh ka jingktah ïa ka mariang.

“Lada ailad ban khlong ïa u mawshun, kan ktah ruh ïa ka lyer, ïa ki jingthung jingtep bad ktah ruh ïa ka koit ka khiah jong ki briew,” ong ka seng ha ka shithi ba la phah sha ka Meghalaya State Pollution Control Board (MSPCB).
Ka UHM ka la kyntu ïa ka MSPCB ba kan pynsangeh noh ïa kane ka jingpynsngew paidbah ne ka Public Hearing kaba la thmu ban pynlong ha ka 19 tarik u risaw 2019 bad kyntu ruh ba dei ban khanglad ïa kane ka jingthmu ka Star Cement ban khlong ïa u mawshun na Brichyrnot.