Ki jingtah pynbhabriew bad ki kyndon kiba phi dei ban bud

Kong Linda Kongwang

Ia ki jingtah pynbhabriew la sdang naduh ki por barim bajah bad ka dei ka sap kyrpang ba la ai da u Blei ia ki kynthei bad ki bud iaki ne ki kyndon haduh mynta. Namarkata phin shem bun na ki kynthei ki ju rah ia ki jingtah pynbhabriew kum ki lipstick, ki eyeliners bad kiwei kiwei kat shaba ki leit.

Shuwa ba phin sdang pyrkhat shaphang kumno ban tah pynbhabriew ialade, ka long kaba donkam ban sumar shuwa iaka sniehdoh dakaba sait khuid ia ki. Ki don bunjait ki tiar sleh khmat kiba phi lah ban pyndonkam ban ioh ia ka durkhmat kaba bha briew. Hato phim nang ban pyndonkam iaki jingtah pynbhabriew haka rukom kaba dei? Kam pher hangne ki don katto katne ki lynti kiba suk kumno ban sdang iaka rukom tah pynbhabriew.

Step 1. Ka rukom pynkhuid ia ki durkhmat. (1)Facial cleanser – Shuwa ban tah pynbhabriew, nyngkong eh phi dei ban sait khuid ia ki durkhmat jongphi. Pyrshang da u clay facial cleanser u ba lah ban weng iaki jakhlia kiba don haka dur jongphi. Khem katto katne u facial cleanser ha kti bad khleh lang bad ka um khyndiat nangta sleh haki durkhmat jongphi mian mian kumba katto katne minit, sa sait khuid da ka um bad niat pynrkhiang.

(2) Face Scrub – Ban pyndonkam iaki face scrub kadei ka lynti kaba bhatam eh shuwa ban tah pynbhabriew iaki durkhmat. U dei uba lah ban pynkhuid iaki thliew step kiba don haka sniehdoh jongphi. Ban pyndonkam ia u face scrub phi lah ban khem khyndiat ha kti bad sa tah haki durkhmat kiba khuid bad rkhiang, nangta kyllan bha daki kti kiba jhieh kumba katto katne minit bad sa saitkhuid bha daka um. Phi lah ban pyndonkam 2 ne 3 sien shitaiew.

(3) Moisturizer – Hadien u facial cleanser bad face scrub phi lah ban tah iaki jing sleh khmat( face cream)ban pynjem iaka sniehdoh. Pyndonkam da u moisturizer uba iadei bad ka sniehdoh jongphi ban lait naka jing mih khniang. Ki moisturizer kiba phi jied ban sleh kidei ban don ia ka Hyaluronic acid bad aloe vera ban ioh iaka sniehdoh kaba phuh slem.

Step2 – Ka rukom tah pynbhabriew ia ka durkhmat. (1) Primer – Ban pyndonkam ia u primer kadei kaba bha tam eh ban pynitynnad ialade.U primer u lah ban pynjah iaki jing thoh lain ne wrinkles kiba don haki dur khmat jongphi ban iada naka jingringsti ka durkhmat. U lah ruh ban iarap pynneh slem iaki jingtah pynbhabriew baroh shi sngi. Jied ia u primer uba iahap bad ka sniehdoh jongphi ban iada naka jingtyrkhong ka durkhmat.

(2) Concealer – U concealer u dei u jingtah khmat u ba bha tam eh ban pynjah iaki jingthangiong jongki khmat. Phi lah ruh ban pyndonkam malu mala haki jaka ba tyrkhong jongka durkhmat ban ioh iaka durkhmat kaba shai bad phyrnai.U iarap ban pyniahap iaki rong khmat bad kiwei ki bynta jong ka durkhmat. Pyndonkam da u makeup brush ne da ki shympriahkti kiba khuid ban tah sharum bad shaneng ki khmat ne ki jaka na jngem jong ka durkhmat.

(3) Foundation – Ka durkhmat jongphi kan ym phuh itynnad khlem lada phim pyndonkam ia u foundation. Ban pynitynnad iaka durkhmat u foundation u dei uba donkam bha. Don bunjait ki foundation kiba phi lah ban pyndonkam hynrei jied u ban iahap ban ka rong sniehdoh jongphi. Pyndonkam da u makeup brush ne sponge ban tah haki durkhmat baroh kawei. Phi lah ruh ban tah haki ryndang ne ki rud shkor lada donkam.

Yn dang bteng.