“Ka sorkar ka buh Model Skul ha ki block ba kiew sted”

Shillong, 16 Jylliew:
Ki liangpyrshah ki la buh jingkylli ia ka sorkar kaba la buh ia ki model skul tang ha ki katto katne ki block ba la kham ha ka Garo Hills.
“Ka long kaba sngew phylla ba ka sorkar kam shym la pyrkhat ban buh ia ki model skul ha Khasi-Jaintia Hills. Nga tip ba ki don ki blok kiba la kham kiew ha ka thoh ka tar wat ha kane ka thain”, la ong u MLA ka Nongthymmai u Bah Jemino Mawthoh haba buh jingkylli hynne ka sngi hapoh ka iing dorbar thawain.
Katkum ka jingtip ba la ioh, ka sorkar ka la rai ban buh khyndai tylli ki model school ha Garo Hills.
Haba jubab ia kane, u symbud myntri rangbah ka jylla ba peit ia ka pule puthi u Prof RC Laloo u la ong ba kine ki model school la buh ha Garo Hills katkum ka surbe ia ka thoh ka tar jong ki kynthei ba la pynlong da ka sorkar pdeng.
“Katkum ka surbe, la shem ba khyndai tylli ki blok ha kaba yn buh ia ki model school ki dei kiba duna bha ha ka jingnang thoh nang pule”, la ong u Prof Laloo bad bynrap ba ka jingnang thoh nang pule jong ki kynthei ha Khasi-Jaintia Hills kam da duna ban ianujor bad ki kynthei ha Garo Hills.
Shwa ia kane, u Prof Laloo u la iathuh ba kine ki 10 tylli ki kyrteng jong ki block ki long ka Selsella (55.37), Saipung (57.12), Laskein (57.40), Dadenggiri (57.71), Khliehriat (58.78), Songsak (62.50), Thadlaskein (64.45), Tikrikilla (62.40), Zikzak (67.14) bad ka Dambo Rongjeng (68.45).