Shillong: Ka KL Bajoria College ka la rah ia ka nam lahduh na ki shynrang ha ka Inter-College Basketball Championship 2019 ba la pyniaid da ka tnad ialehkai ka skul bah NEHU, hadien ba ka la pynliem noh da 57-56 ia ka St. Anthony College, Shillong ha ka jingiakhun final hynnin ka sngi ha NEHU Permanent Campus, Shillong.
Katba ka St. Anthony College ka la rah ia ka nam lahduh na ki kynthei da kaba pynliem ia ka Lady Keane College.
Kane ka lympung ialehkai ki samla pule kolej ka la sdang naduh 17 bad la pynkut hynnin ka sngi hapdeng ka jingiphuh iphieng ha madan ialehkai ha NEHU Campus Mawlai, Shillong.
Ia ka nam Most Valuable Player na ki kynthei la ioh rah da ka Caroline Kharpuri na St. Anthony College, Shillong bad na ki shynrang la rah da u Henminlam na ka K.L. Bajoria College.
Ha kane ka sni pynkut la donlang u Prof. A.K. Nongkynrih, na ka Department of Sociology, NEHU kum u kongsan ban sam ia ki khusnam sha ki kynhun ba jop bad u Asst. Director (Sports), NEHU u N.Das, Basketball Coach kong A. R. Synnah bad ki kiwei ki riew rangbah kiba la wan ban sakhilang ban ai mynsiem ia ki nongialehkai.
Phi don ban ong eiei?