Shillong: Ka Confederation of Indian Industry (CII) ka la pynlong ia ka jingiathir kaba lai halor ka phang ban pynrung ia ki jingialehkai kum ki sobjek ha ki skul. Ia kane ka jingiathir kaba ai kyrteng ka School Sports Forum – Making Sports an Integral Part of School Education la pynlong ha State Convention Centre Shillong myn hynnin ka sngi.
U myntri ka tnad ialehkai ka jylla, u bah BanteidorLyngdoh, u la iadon lang lem bad u bah Vincent H Pala, Member of Parliament, Lok Sabha (Shillong).
Haba kren ha kane ka jingialang, u bah Banteidor u la ong ba ka long kaba donkam ba ki skul kin ai ia ka jinghikai ha ka bor met, ban don ki tiar ba biang ba kin ioh ban ban hikai ne kilanmet hadien ba la wai na skul. U la ong ba ka jingdonkam ban thung ia ki nonghikai khnang ban pyniaid ia ka jingialehkai ha ka lynti kaba beit.
Katba u bah Vincent u la ong ba ka jylla ka la ioh pdiang ia ka jingiarap na ka tnad ialehkai ka mri hapoh ka jingialam u bah Banteidor kum u myntri kaba la wanrah shibun ki jingjop ha ka Meghalaya.
Ha kane ka sngi, ka CII ka la pynkup burom ruh ia ka kong Linza Fenny Syiem ha ka Karate, u bah Aiborlang Khongjee ha ka phutbol bad u Mehrajuddin Wadoo ha ka phutbol .
Kane ka jingai burom ka long kum ka jingithuh ia ka jingnoh synniang jongki ha ki kam ialehkai ba ki don ha ka jylla bad kumjuh ha ka ri.
Ha kane ka jingialang la ioh ruh ia ka jingiathuh ia ka khana jingjop jong ki khynnah ka Bethany Society, Shillong ha ka jingialehkai.
Phi don ban ong eiei?