Ther ki liang pyrshah ba aiti ia ki Medical College sha ka kompeni

Shillong, 13 Jylliew:
U MLA ka NPP u James K Sangma u la buh jingkylli ia ka rai ka sorkar ban aiti ia ka jingtei ia ka Medical College ha Shil long sha ka kompeni ba long artatien.
“Nga sngew lyng ngoh ba ka sorkar ka la aiti ia ka jingshna ia ka projek ia ka medical college ha ka kompeni na Kolkata ka KPC group.
Kane ka kompeni ka don ka jinglong artatien ne bym thikna”, la ong u Sangma haba wanrah ia ka jingkylli ha iing dorbar thawain mynta ka sngi Thohdieng.
U la ong ba ka KPC Group ka la shah ujor ba ka thok ia kumba 21 tylli ki kam bad ka jingthok ia ka Kashari ha United States.
U MLA ka NPP u la ong ba la ka sorkar ka la tip ne em ia ka jingdonkti kam beain kane ka kom peni. Haba jubab ia kane, u myntri ka tnad ka koit ka khiah u Bah AL Hek u la ong ba ka sorkar kam tip eiei ia ki kam beain kane ka kompeni.
Halor ka jingkylli u Sangma la ka sorkar kan weng noh ne em ia ka jing aiti ha kane ka kompeni, u Bah Hek u la ong ba kim don daw ban weng noh ia ka jingiateh namar ba ka sorkar kam don sakhi ban pynshisha ba kane ka kompeni ka don dak sniew.
Haba u MLA ka NPP u la pan ia ka jingpynthikna na u myntri ban pynlong ia ka jingtohkit halor kane, u myntri u la ong ba ka sorkar kan peit ia kane lada donkam.
Shwa ia kane, u Bah Hek u la iathuh ba ka jingiateh la iasoi bad kane KPC Medical College and Hospital, Jadavpur na ka bynta ban tei ia ka medical college lyngba ka Public-Private Partnership (PPP) ban shna ha Reid Provincial Chest Hospital (RPCH), Shillong, bad ka jingmang pisa ka long T.250 klur.
“Ha kajuh ka por, ka jaka ban shna ia ka RPCH hospital ym pat dep ban aiti namar ba ia kane ka hospital khlem pat kynriah sha Umsawli, Mawdiangdiang. Ka jingshna ia ka TB hospital ba thymmai ka dang iaid shakhmat”, la ong u Myntri.
U Bah Hek u la ong ba kumba 40 percent ka jingshna ia ka TB Hospital la dep.
“Ngi kyrmen ban kynriah ia kane ka hospital TB kloi katba lah”, la ong u Bah Hek.
Ha kaba iadei bad ka Medical college ha Tura, u Bah Hek u la iathuh ba ka sorkar ka la ioh ia ka jaka kaba heh 99 akar ka jaka ha Balagre A’King bad Jewilgre.
“Ka Letter of Award (LOA) jong ka jingtrei la shna da ka Detailed Project Report (DPR) bad ban pyniaid ia ka jingpyntrei ha Tura la pynmih sha ka Telecommunications Consultant India Limited (TCIL),” la ong u Bah Hek.
U la ong ba ka projek yn pyndep kloi hapoh 36 bnai naduh ba iasoi ia ka soskular.
U Bah Hek u la ong ba ka sorkar ka la pynlut T.3.40 klur ban siew ia ka bai jaka sha ki briew.