Ngin ialeh bad trei shitom ban pynurlong ia ka International Stadium ha Madan Kurkalang

Nongpoh: “Kum u Myntri ba deipeit ia ki kam ialehkai hapoh ka jylla, nga don ia kata ka jingangnud kaba khraw ban kyntiew ia ki kam ialehkai hapoh ka jylla” ong u Bah Banteidor Lyngdoh, ha ka jingialang bad ki nongialam ka RBDSA, ki la leit ban iakynduh ia u na ka bynta ban iakren halor ka jingthmu ban aiti noh ia ka Madan Kurkalang sha ka sorkar bad ban pynkylla ia katei ka madan sha ka International Stadium.

Haba kren sha kitei ki nongialam ka RBDSA, kaba la iadonlang ruh da u Bah George B. Lyngdoh, MLA ka Umroi, u Bah Charles Marngar, MDC ka Mawhati, u Bah R.B Shadap, President ka RBDSA, u Bah Banteidor Lyngdoh, u la ong ruh ba haba iadei bad ka kam ban kyntiew ia ki kam ialehkai soprts hapoh ka jylla, ngim dei ban don kata ka jingiasngewpher ha ka Politik, hynrei ngi dei ban don beit tang ia kawei ka thong bad kata ka long ba kyntiew ia ki khun samla kiba don ia ka sap ialehkai bapher bapher.
Haba kren halor ka jingthmu ban pynkylla ia katei ka Madan Kurkalang sha ka International Stadium, u Bah Banteidor Lyngdoh, u la kubur ba ka jylla ka la donkam kyrkieh ban don ia kawei ka (International Stadium) ne ka jaka ialehkai kaba biang bad khamtam eh haba ka jylla kan sa pdiang ia ka National Games ha u snem 2022.

Ha ka jingiakren bad kitei ki nongkitkam ka RBDSA, u Bah Banteidor Lyngdoh, u la ong ba lada ka jylla kan don ia kawei ka International Stadium ne ka jaka ialehkai kaba biang na bynta ki rangialehkai, ka por kan poi ba ki Club bna nam ha ka Pyrthei na ki Ri kiba don ha Dewbah Europe, kin sa wan ban ialehkai lyngba kita ki jingialehkai kaba la tip kum ki (Seasonal Match) bad khamtam eh ba ka jylla Meghalaya kan don ia ka suinbneng kaba biang eh na ka bynta ki rangialehkai, ha kaba kane ruh kan dei kawei na ki lad ka ban kyntiew ia ki kam ialehkai bad khamtam eh ia ki khun samla ba kin iohi da ki khmat ia ki rangialehkai bna nam ka pyrthei.

Haba iadei bad katei ka jingthmu ban pynkylla National Stadium ia ka Madan Kurkalang, u Bah Banteidor u la ong, ba ma u lem bad u Conrad K. Sangma, Myntri Rangbah ka sorkar jylla, kin sa leit ban iakynduh ia u Myntri Rangbahduh ka Ri u Narendra Modi, na ka bynta ban iakren halor ka jingpyntrei ia katei ka Stadium bad khamtam eh kum ka jingpynkhreh ia ka National Games ha u snem 2022.