Por elekshon ki wohnia lada jied ia u bah Sanbor, un khang lut ia ki ïingmane

Shillong: U MLA ka BJP na South Shillong u bah Sanbor Shullai uba long ruh u Chairman ka Meghalaya Tourism Development Corporation (MTDC), u la kynthah jur ia kito kiba kynnoh ia u ha ka por elekshon ba lada un jop, un sa khang lut ia ki ïingmane, ki dukan doh masi.

U Bah Sanbor u la kren ia kane haba plie ia ka surok na skul Assamese Girls Secondary School Laban sha madan Basketball ka St John Higher Secondary School, Madan Laban kaba la mang T. 1,01,55000 ba la shna ha ka jingmang na ka Special Plan Fund (SPA) ha u snem 2017.

Haba kynthah ia kiba wohnia pyrshah ia ka BJP ba ka leh bein ia ki rit paid, u bah Sanbor u la ong, “Ha ka por elekshon, ki wohnia da kaba ong, lada jop u bah Sanbor na ka BJP, un khang lut ia ki iing mane, dukan doh masi, u dei uba pyrshah ne isih Khristan. Hynrei mynta ka la sakhi ba ka jinghikai jong baroh ki kot ba khuid la ka dei ka Baibl, ka Ramayan, Quran ne ka Gita ki hikai ia kajuh, ngi dei ban burom, ban ieid ia ka jinglaitluid ki niam baroh”.

U la bynrap, “Wat la ngi dei na ki jingngeit bapher bapher hynrei ngi dei kajuh ka snam bad mynta ka sakhi ba nga dei uba nyngkong ban pynioh ia kane ka surok na ka bynta ka jingbit jingbiang ki riew ngeit Khristan”.
U la pynkynmaw ia ka jingkren u myntri rangbahduh ka ri ba ka sorkar BJP kan iada ia ki rit paid ha ka ri khamtam ia ki Khristan.
“Shwa ban bam smai u Myntri Rangbahduh ka ri u Narendra Modi u la kren ha ka jingialang ka National Democratic Alliance (NDA) da ka khubor kaba tyngeh ba ki 543 ngut ki MP ki dei na ki bynta bapher bapher bad ki dei ban iatreilang. Ka sorkar ka dei ka don ka jingkitkhlieh ban iada ia ki rit paid bad kita ki dei ki Khristan”, la ong u bah Sanbor.
U la ong ba u Modi u dei u nongialam ka pyrthei uba leit ban leit sngewlem ha ïingmane ha Sri Lanka ha ka por ba ka shah pynbthei bom.
“U (Modi) la ong ba ka sorkar kan iada ia ki Khristan ha India bad ym don ba lah ban ktah ia ki Khristan ha India”, la bynrap u bah Sanbor.
La sakhi ha kane ka sngi da ka jingdon lang ki nongkitkam shnong, u Secretary ka St John Higher Secondary School Laban u Fr. C Khongwir, ka Principal ka Assamese Girls Secondary School, ka Depali Sharma Roa, ki khynnah skul nalor u bah C Kharmudai u Executive Engineer ka Shillong Central Division, u bah S Lytep u Assistant Executive Engineer Shillong B Sub-division bad kiwei.