Maham ka HNYF ia ki trok dewiong kiba iaid laitlan sha Ribhoi

Nongpoh: Ka Hynniewtrep National Youth Front, Northern Region, hynne ka sngi ka la pynsngew lem ia kata ka jingsngewkhia halor ka khubor kaba la mih ba ka la don ka jingiaid laitlan ki kali kit dewiong, hynrei kaba la pynsngewkhia eh ia ki nongrim ka HNYF, ka long hadien ba ki la ioh jingtip ba ki don ki Trok kit Dewiong, ki la iaid lait na ka jaka thew Weight Bridge, Nar-ang, da kaba ki pyndonkam da kiwei pat ki surok kiba don ha Ri Bhoi.

Haba kren sha ki Lad Pathaikhubor, u Bah Marcus Marten, President ka HNYF, NR, u la ba ka seng hi ka la ioh jingtip halor ka rukom iaid ki trok kit dewiong, kaba la long laitlan shaba palat hapoh kane ka district, namar ki don bun ki trok kit dewiong, kiba la pyndonkam da kiwei ki surok tang ban iaid lait na katei ka weight bridge bad kaba la long pyrshah ruh ia ka kyndon Ain 144 CrPC ba la pynjari ha Ri Bhoi.

Shuh shuh u Bah Marcus Marten, u la ong ba ka seng kam tip la kitei ki trok ki dei kiba don challan ne em, hynrei ka daw kaba la pynlong ia ka seng ba kan pyrshah, namar ba kitei ki trok ki pyndonkam da ki surok shnong tang ban iaid lait na katei ka Weight Bridge bad kaba la wanrah jingeh pat ia ki paidbah namar ka jingsniew surok.
Haba kdew ia ki surok kaba la ju iaid da kitei ki trok Kit dewiong, u Bah Marcus Marten, u la ong ba kitei ki trok ki ju pyndonkam ia ki surok kiba kynthup ia ka surok na Mairang-Patharkhmah, na Umling-Pahammawlein, ka surok na Umsning-Mawhati ban mih sha Umsiang, ka surok Nongpoh-Umden-Sonapur, namar lyngba jong kitei ki surok, la lait na katei ka Weigh Bridge kaba don ha Narang.
U la ong ruh ba katei ka jingiaid ki trok na kitei ki surok, ka long ban lah ban pynim beit ia ki challan watla ki iaid ne kit bunsien, kumta halor katei ka nongrim na ka liang ka seng ka dap da ka jinglyngngoh kaba khraw ba na ka liang ki bor sorkar kim shem la phaikhmat ne ban leh ei ei ia kitei ki trok, kiba la pynkhien Ain.
Kumta, halor kane, na ka liang ka HNYF ka la pynmih ia ka jingmaham kaba tyngeh ia ki kali kit dewiong ban kim dei ban pyndonkam bakla ia ki surok shnong bad ha kajuh ruh ka por ka seng ka la kyrpad ia ki bor pulit ka district bad ruh ia ki bor pyniaid district ba kin pyrkhing, na ka bynta ban tehlakam ia kitei ki trok kit dewiong kiba la pyndonkam bakla ia ki surok shnong, u la bynrap