Nongpoh: Ka Lumniwar Sports Club, ka la long kum ka lahduh napdeng baroh ki kynhun na ka thain Mawhati, kiba la wan iashimbynta ha ka Mawhati Zone jong ka Ri Bhoi League, kata hadien ba ka la lah ban pynliem noh pyrshah ia ka Sonidan Sports Club da 2-1, ha ka jingiakhun phainal na katei ka Zone, kaba la long hynnin ka sngi ha Madan ialehkai phutbol ka Kdohhati.
Shwa ban sdang katei ka Phainal, la ioh ruh ban plie paidbah ia ka (VIP Gallery) ne ka jaka shong ia kaba la tei ha Madan Mawhati, lyngba ka jingnoh synniang da utei u MDC ka Mawhati bad kiba la sakhilang ha katei ka sngi, ki kynthup ia u u Bah R.B Shadap, President ka RBDSA, u Bah Paul Nongrum, Football Secretary ka RBDSA lem bad kiwei de ki riew rangbah jong katei ka thain.
Haba phai sha katei ka jingiakhun, da shisha ka la long ka jingiakhun kaba itynnad bad kaba la pynhun ia ki paidbah kiba la leit ban sakhi, namar ki rangialehkai jong kitei ki ar kynhun, ki la iakhun tyngeh ba ka bynta ban knieh ia ka namlahduh na katei ka Mawhati Zone.
Da shisha ha katei ka jingiakhun, u sawar jong ka jingjop u la kham noh sha ka kynhun ka Sonidan SC, namar ki rangialehkai ki la kham lah ban tehlakam ia ka jingiakhun, haba kaba ki lah ruh ban lamkhmat ia ka jingiakhun da kaba ioh thep kol nyngkong, hynrei katei ka kol kaba la lamkhmat da ka Sonidan SC, kam shem la neh slem, namar tang hadien katto katne minit, ki rangialehkai ka Lumniwar SC, ki la ioh ban pynphai kylla ban pyniakhaid bad pynkut ruh ia ka kylla step da 1-1.
Haba bteng ka kylla miet, ka jingiakhun ka la nangitynnad, namar kitei ki rangialekai ki la iakhun tyngeh ban ioh thep kol bad ban khur ia ka namlahduh na ka Mawhati Zone, katba ka jingiakhun ka la nangiaid shakhmat, uwei na ki rangiahkai ka Lumniwar SC, u la ioh ia ka kabu kaba biang ban thep biang sa shi kol bad kaba la neh haduh ba kut ka jingiakhun, kaba la pynlong ruh ia ka Lumniwar SC ba kan pynliem noh ia ka Sonidan SC da 2-1.
Ka Lumniwar SC kaba la ioh ban rah ia ka namlahduh na ka Mawhati Zone, ka la ioh ia ka khusnam pisa kaba T. 6 hajar bad ka Sonidan SC ka la ioh T. 4 hajar lem bad ka Trophy. Kitei ki ar-kynhun kiba la poi sha ka Phainal, ki sa ioh ruh ban aireng ha ka Final Round na ka bynta ban iaknieh pat ban rah ia ka namladuh ha ka Ri Bhoi League.
Phi don ban ong eiei?