“Ngin sa jop” yn pyni ha Bijou Cinema

Shillong: ‘Ngin sa jop’ ka phlim ka ban sa pyni paidbah noh ha ka 20 tarik Nailur 2019 ha Bijou Cinema hall ha ka ba la pynbit pynbiang da u IB Thim bad pynmih da u bah Robert Sohbar.

Ia kane ka phlim yn pynmih ha ka Ktien Khasi bad Garo bad lyngngam ha ryngkat ki jingthoh ban batai ha ka ktien English. Ia kane phlim la ring dur ha Shahlang, Tura, Nongstoin, Nongkhnum, Smit, pung Umiam, Nan Polok bad kiwei kiwei.

Ka khana ha kane ka phlim ka long shaphang ka kam runar ha ka sain-pyrthei bad ka khana jingieid. “Ngi kyntu ia ki paidbah ban wan peit ia kane ka phlim ban ai mynsiem bad jingkyrshan ia ngi”, la ong u bah Robert Sohbar haba kren ha ki lad pathai khubor.
Ia kane ka phlim yn pyni lai sien ha ka shi sngi, kata naduh ka por 11 shiteng mynstep, 2 shiteng nohphai sngi bad 5 shiteng janmiet. Ia kane ka phlim yn sa pyni na ka bynta ar taiew bad ki nong-pynmih ia kane ka ki khmih lynti ba kan iaid ïew bha.
Ia kane ka phlim la pynlut haduh 35 lak tyngka bad kane ka phlim la pynbit pynbiang bha ruh da ka West Khasi Hills Film Makers’ Association, Shahlang. U tyngshop kane ka phlim u dei u bah Fasterlin Rashir.