Shillong: Ka Nongthymmai Sports & Cultural Club, Shillong ka dap da ka jingsngew kmen kaba khraw ban iohlad ban rung biang sha ka 1st Division jong ka kynjatbol ba la pyniaid da ka Shillong Sports Association (SSA) ha Polo Ground hadien lai snem naduh ba kala hiar noh sha ka 2nd Division ha u snem 2016 bad khamtam lei ba une u snem 2019 u dei ba kum ka club ka rakhe ia ka jingdap 75 snem ka club(Platinum Jubilee).
Ha ka jingpyllait kyrwoh, u secretary u bah John Cajee u la ong ba ka club kan ialeh ia ka phainal pyrshah ia ka Umphyrnai Sports Club ha kane ka sngi Saitjain ka ban wan kata ka 21.09.2019 ha ka por 3.00 PM ha Jawaharlal Nehru Stadium, Polo Ground. Kumta, ka club ka kyrpad jur ia ki nongshong shnong jong ka Nongthymmai Pyllun ba kin iawan ban ai mynsiem bad kyrshan lem ia ka Club ha kane ka sngi phainal.
“Ngi da kyrpad ba phin ba kin iarah lem sha Madan Polo ia ka bom ne ka ksing ban kham sngew tynnad ki nongshongshnong haba kyrshan ia ka club”, la ong u bah John.
Na ka liang ka club, kala pynkhreh ia ki lama bad ka bus ruh ban leit ai mynsiem ia ki player sha Madan Polo. Ka jingjop ha kane ka sngi kan da long shisha ka burom ia ki nongshongshnong ka Nongthymmai hi baroh kawei.
Ha kajuh ka por, lyngba kane ka lad pathai khubor ka jong phi, ka club ka kwah ban ai khublei kyrpang ruh ia ka skul H.Elias HS kaba dei naka shnong Nongthymmai kaba lah ioh rah ia ka nam lahduh ha ka Subroto Cup 2019 Under 17 boys da kaba pynliem noh ia ka skul kaba na Bangladesh da 1 kol la nod.
Kane ka jingjop ka lah long shisha ka burom ia ka skul bad ia ka jylla hi baroh kawei.
Phi don ban ong eiei?