Kat kaba ioh ka biang, ka shong ha u MR, ong u bah Brolding

Shillong: U bah H Brolding Nongsiej u la pyndap ia ka shuki myntri kaba sah thylli hadien ba la iehnoh u bah Metbah Lyngdoh, da kaba pyndep ia ka jingbam smai mynta ka sngi.

U Bah Brolding uba jop ar sien kum u MLA ka UDP na Mawthadraishan, u la
bam smai kum u myntri ka sorkar Meghalaya Democratic Alliance (MDA), ba la pynbam smai da u Lat ka jylla u T Roy ha Raj Bhavan ba la sakhi lang u myntri rangbah u Conrad K Sangma, u Lamphang ka iing dorbar u bah Metbah Lyngdoh nalor kiwei ki myntri sorkar bad ki heh ki hain.
U bah Brolding u mih bujli ban shimti ia ka shuki myntri ha jaka jong u bah Metbah Lyngdoh, uba la shimti noh ia ka shuki Lamphang ka ïing dorbar thaw ain ka jylla.
“Ngam da kwah ban ong ban ong ai ia nga kumba kiwei ki kwah ia kata kaba ki kwah kaba kham don dohmet hynrei nga shaniah ha ka jingstad u myntri rangbah, kaei kaba u ai, u la kham tip kham bha, nga shaniah ia kata”, la ong u bah Brolding haba kren sha ki lad pathai khubor hadien ba la bam smai.
“Ia ka tnad ban peit, ngam pat tip hynrei nga shaniah ha u myntri rangbah, katba u ai ia nga, nga hun, bad kano kaba u shaniah, ngan trei shitom ban kyntiew ia ka jylla”, la bynrap u bah Brolding.
U la ong ba ka kam myntri ka dei kaba khia namar ba na ki 60 ngut, tang 12 ngut ki don ki myntri bad haba shim ia ka lyngkor, hap ban don ka jingkitkhlieh ia ka ri bad ka jaitbynriew.
U la pynpaw ia ka jingsngew kmen ban shimti ia ka shuki myntri khnang ba un lah ban shakri kham bha ia ka konstitwensi bad kumjuh ia ka jylla.
“Nga sngew kmen ban ioh ia ka kam myntri bad kum ka konstitwensi kaba thymmai, bad lyngba kane ka kam myntri, ngan lah ban iarap ia ka konstitwensi bad ia ka jylla”, u la ong.
U Bah Brolding u la jop ar sien kum u MLA ka UDP na Mawthadraishan kaba dei ka ktem ba khlain ka HSPDP ha ka por mynshwa.
La sngewthuh ba u bah Brolding u lah ban nym ioh bat shuh ia ki tnad ba la ju bat u bah Metbah hynrei un sa ioh da kiwei pat ki tnad. Ia ki tnad ba ju bat u bah Metbah lah ban ioh da kiwei pat ki myntri ka UDP.
Lah ban kdew ba ia kane ka shuki, la iaknieh hapdeng u bah Nujorki Sungoh u MLA ka UDP na Mokaiaw bad kumjuh u bah SK Sunn uba la wan iasoh sha ka UDP hadien ba la jop na Mawphlang.
La iohi ba ha kane ka jingpynbam smai, bun ki myntri sorkar bad ki MLA ka liangsynshar kiba jah kynthup na ka liangpyrshah ruh.