Mih U MLA ka Jirang bad Umsning, ba dawa thung Myntri ka RBYF na ka sorkar

Nongpoh: Kum kawei na ki sengbhalang kaba peit ia ka bha ka miat bad ka roi ka par ha Ri Bhoi, ka Ri Bhoi Youth Federation, hynne ka sngi ka la pynsngew hakhmat ka sorkar MDA, da kaba dawa syndon ba ka dei ban thung uwei u Myntri na Ri Bhoi District.

U Bah Wanpher S. Wahlang, Publicity ka RBYF, u la ong ba ka seng ka sngew ba ka Ri Bhoi, ka la shah iehbein na ka por sha ka por, namarkata ha kaba kum kane ka por ki sngewdei ban dawa na ka sorkar MDA, ba ka dei ban thung noh uwei na ki MLA ha Ri Bhoi ba ki dei ban don ha ka thup ki Myntri.

Lah ruh ban kdew hangne, ba na ki 5 tylli ki Konstitwensi ha Ri Bhoi, arngut ki dei na ka Congress, arngut na ka NPP bad uwei na ka PDF, hynrei katkum ka kyrwoh na u Publicity ka RBYF, la pynpaw ba ka sorkar MDA ka dei ban thung Myntri ia uwei napdeng kitei ki MLA ki bym dei Congress.
Halor katei ka jingdawa thung Myntri ia uwei napdeng ki MLA ka Ri Bhoi, ka RBYD ka la pynmih ia ka kyrteng jong u Bah Sosthenes Sohtun, MLA ka Jirang na ka NPP bad u Bah Jason S, Mawlong, MLA ka Umsning na ka PDF, hynrei ki khlem pynmih pat ia ka kyrteng jong u Dasakhiatbha Lamare, MLA ka Mawhati na ka NPP.