Shillong: Ka long ka burom ia ka jylla hi ha kaba ka jylla ka la pawnam ha ka map ka ri India kum ka ktem ka jingialehkai phutbol syndon ha ka ri, bad kane ka la long hadien ba ka Hopewell Elias Higher Secondary School, ka la rah nam lahduh jong ka lympung ialehkai Diamond Jubilee Subroto Mukherjee Cup International Football Tournament 2019.
Ha ka jingiakhun ia ka phainal mynta ka sngi ha madan Ambedkar Stadium, ha nongbah Delhi, ka H. Elias HSS ka la lah ba kan pynliem ia ka skul BKSP Bangladesh da 1-0. Ka BKSP ka dei ruh ka lahduh mynshem snem ha kane ka lympung.
Ia kane ka kol ba kordor tam ia ka H. Elias HSS la thep ia ka da u Santi Jnai Shianglong ha ka kylla step.
Kumba la dep ban iakren lypa bad kiane ka lad pathai khubor, na ka liang u coach jong ka tnat Directorate of Sports & Youth Affairs u bah Bobby. L. Nongbet, u pynpaw ba um khein sting satia ia kane ka kynhun ialehkai napoh Bangladesh, da kumta marsien ia sdang jong ka jingialehkai, ki player jong ka H. Elias HSS ki la ialeh katba lah ban kham pynsted ka rukom ialehkai ka jong ki kaba bunsien ka rukom ia pashat bol ka dei beit na madan,
Nalor katta, ki player jong ka H. Elias HSS ki la ialeh katba lah ban nym ailad ba ka bol kan iai neh slem ha ki kjat jong ki player ka DKSP Bangladesh, kaba da shisha ka la pynhun hi jrut ia ki khmat u paidbah nong peitkai ia kane ka jingiakhun.
Wat hadien ba ka H. Elias HSS ka la dep ba kan tam lypa shakhmat da shi kol ha ka kylla step, pynban haba la wan ban bteng ia ka kylla miet, ka la iai bteng ba kan nion beit shakhmat ka rukom ialehkai ka jong ka bad iai bteng ban khanglad ia ki player ka DKSP Bangladesh ba kin nym lah ban jam palat shakhmat.
Ha kum kane ka sur ialehkai ba ka la sdang ban pynthnam ia ka janor ki player jong ka DKSP Bangladesh tad haduh ba ka la hap ba kan ialehkai satang 9 ngut ki player ha madan, hadien ba arngut na ki nongialehkai ki jong ka, ki la ioh ba kin pdiang ia ka red card, ha kaba uwei u player u la shah beh shabar hadien ba u la ioh ba un pdiang ia ka yellow card kaba ar katba uwei pat u la ioh ba un pdiang namar ka foul pyrshah ia u player jong ka H. Elias.
Kine ki artylli ki red card kam lah ban khlem da buh jingeh bha ia ka DKSP Bangladesh kampher wat hadien ba kan shah tam shakhmat tang das hi kol, pynbhan kam lah pat ba kan khie khlieh ban lah ban pynphai ia ka, namar ba ki player jong ka H. Elias HSS ki la pynleit jingmut bha ialade bad khanglad beit ia ki jingpyrshang ba la wan ban mih paw na ka kynhun ialehkai ka DKSP Bangladesh.
Ha ka kylla step hadien ba ka H. Elias HSS ka la dep ba kan tam shakhmat, ka DKSP Bangladesh ka la ioh ia ka kabu ksiar ban jan ioh pynkhih ia ka jar, ia kaba la lah ban kyrda noh ia ka da u Urbanity Makhroh.
Kumta ha baroh shi linter jong kane ka jingialehkai, kum ka kynhun ka H. Elias HSS ka la sei madan ia la ka sur ialehkai kaba itynnad bad kaba pyniapbiej ia ki khmat u paidbah nongleit peitkai.
Ha kane ka jingiakhun la leit ban sakhi lang ruh da u myntri ba dei khmih ia ka tnat Sports ka sorkar jylla u bah Banteidor Lyngdoh ryngkat u Principal ka skul Fr. Sebastian Palaty.
Nalor katta ka H. Elias HSS kam shym la kut ba kan ioh ba kan rah tang ia ka nam lahduh bad ia ka song pisa kaba saw lak tyngka, pynban ka la bteng ba kan khur haduh saw tylli ki khusnam kaba kynthup ia ka nam best goalkeeper, ka nam best player kaba leit sha u Santi Janai Shianglong, Best Coach ba la rah da u Bobby L. Nongbet bad Best School Contribution Team jong kane ka lympung ialehkai.
Kongsan ba la don lang ha kane ka jingialehkai dei u AIR Chief Marshall u Birender Singh Dhanoa, PVSM, AVSM, YSM, VM, ADC.
Phi don ban ong eiei?