Shillong:Kum shi bynta ban pynrem ia ka jingmynthi Jong ka Sorkar jylla ban pyntrei kam ia ka Inner Line Permit(ILP) ki 13 seng ba pher bapher hapoh ka shatri jong ka Confederation Of Meghalaya Social Organisation (COMSO) mynta ka sngi ki la pynlong ia ka jingialang paidbah ha Motphran.
Haba ai jingkren ha kane ka sngi kum u Chairman ka COMSO u bah Robert June Kharjahrin, u la pynrem jur ia ka jingsngap mynthi jong ka Sorkar Jylla ban pyntrei kam ia Inner Line Permit (ILP).
U bah Robert u la ong “Ka jingpyntrei kam jong ka ILP kam dei tang ka jingkwah jong ngi ki sengbhalang hynrei ka dei ka rai jong ka High level Commitee of Influx ba la wanrah da u ma Bindo M Lanong u ba long u advisor jong ka UDP ha u snem 2012, ka UDP mynta ka don ha ka sorkar balei kam shimkhia ia ka jing ai jingmut jong u nongaijingmut (advisor) jong ki.lada ka jingai jingmut jong u kim burom kane ka pyni ia ka jing bym burom jong ki ia une u riew rang bah.”
“Ha ba ngi leit ban iakren bad ka Sorkar shaphang ka ILP ki ong hap pule bad tip shwa ia ka ain hynrei hadien 2 snem ba ngi la pule bniah bha ngi la dep pynbeit bha da leit ia kren kim lah shuh ban ia nia ki sdang sa ka kren kyllain sa kumwei pat.”u la ong
“Ka por mynta kam dei shuh ban kren shi kren shaphang ka ILP hynrei ngi donkam ban pyntrei kam noh ia ka ILP ha ka jylla katta ka sur u paidbah ka jylla Meghalaya.”
Ki lai tylli ki mat ki ba ki 13 seng ki dawa ha ka ILP ki long ba uno uno u bar jylla ym dei ban wan rung kyrthep sha ka jylla khlem da ioh jing bit.
Lada ai jingbit ruh ym dei ban ai jing bit tang 129 sngi, ym ban shong sah hangne.
Lada don uno uno u ba rung khlem ioh jingbit dei ban ai jingpynshitom kat kum ka ain. Ka wei pat ka long ban ym dei ban ai jingbit ia u barjylla ban thied khyndew ha Jylla ia ngi.
U bah Robert u la khot lawer ruh ia baroh ki wei ki seng bha lang ban ia snohkti lang ban wanrah ia ka ILP ha ka Jylla.
“Ngin ia mareh lang mynta lada ngi don ka juh ka thong ngin ia shong ban ia phylliew jing mut kawei kasur kawei ka jingmut ban wan rah ia ka ILP ha ka jylla ngi donkam ia ka jingiatrei lang ym ia ka jingsngewmeng ban iada ia ki jait bynriew to ialam mano mano ruh ai kyrteng iano iano ruh kam leilei hynrei ban iatrei lang ban ioh ban pyntrei kam noh ia ka ILP ban iada ia ka paradoh parasnam ka jylla,”u la ong.
Phi don ban ong eiei?