Pynkynriah ka FKJGP ia ka phutbol ki Riew Rangbah ha Ri Bhoi

Nongpoh: Ka Federation Of Khasi Jaintia and Garo People, North Khasi Hills District, ka la ai por biang sa shisien na ka bynta kito ki kynhun kiba kwah ban shim bynta ha ka Veteran Knock-Out Football Tournament ban sa pynlong da ka seng ha Madan NSCA, Pahamsyiem, Nongpoh ha Ri Bhoi.

Kum ban pynkynmaw, ka FKJGP, North Khasi Hills District ka la rai ban pynlong ïa kane ka Tournament ka dei shi bynta ka jingrakhe ka seng ïa ka jingdap 30 snem ka jingiaid lynti ka seng naduh ba la suit la shor ba kane ka seng ka la sdang ban ai ka jingshakri na ka bynta ka bha ka miat bad ka roi ka par jong ki paidbah ha rilum Khasi-Jaintia bad rilum Garo.

Haba ïa kren bad ki Nongthoh khubor, u Sport Secretary ka FKJGP, North Khasi Hills District, u Bah Banshan Nongbet u la ong ba ka seng kum ka jingaild ban dang ioh shim bynta ki kynhun ha kane ka tournament, ka seng ka la rai ban dang ai por biang ïa kino kino ki kynhun kiba kwah ban shim bynta kata haduh ka 21 tarik u Nailur ba kin lah ban wan thep kyrteng bad ka tarik ban sdang noh ïa kane ka tournament kan long ha ka 28 tarik u Nailur ha madan NSCA, Pahamsyiem, Nongpoh.
U la iathuh ruh ba ka bai entry na ka bynta kane ka tournament ka long tang T. 3000 bad ka khusnam pat ka long T. 1 lak na ka bynta ka kynhun lahduh, T. 50 hajar na ka bynta ka kynhun ba wan baar bad T. 10 hajar na ka bynta ka kynhun ba wan balai bad kan don ruh ki khusnam shimet.