Hadien ka Iewduh sa ka iew Sohra, yn khang pyndonkam plastic

Shillong: Hadien ba la sdang ban khang pyndonkam plastik ha Iewduh, Shillong, ka tnad iew ka Khasi Hills Autonomous District Council (KHADC) ka la rai ban pyniar sa sha iew Sohra bad ka jingjari ia ka rai ban pyntreikam ia kane ka jingkhang plastik kan treikam naduh ka 23 tarik mynta u bnai Nailur 2019.

Haba pyntip ia kane sha ki lad pathai khubor hadien ba la wai ka jingialang bad u Syiem ka Hima Sohra mynta ka sngi, u Executive Member (EM) ba peit ia ka iew, u bah Jambor War u la ong u la ong ba ka iew Sohra kaba dei ka jaka jngohkai pyrthei ba pawnam, bad la rai ban pyntreikam ia ka jingkhang plastic ha katei ka iew kumba la leh ha Iewduh.
Ha kane ka jingialang nalor u bah Jambor, la don lang u bah Titosster Well Chyne u EM ka tnad khyndew, u syiem ka Hima Sohra ba la mihkhmat da u paiem Freeman Syiem bad ki myntri.
U bah Jambor u la ong ba kumba la sdang na Iewduh, ka Council ka kwah ban pyniar ia kane ka rai sha kylleng ki iew ki hat ba don hapoh u pud u sam ka KHADC.
“Yn pynbna paidbah ban khang pyndonkam plastik ha iew Sohra bad ka jingkhang kan sdang noh naduh ka 23 tarik Nailur ha kaba ka Hima Sohra kan leh ia kane ka hukum khamtam ba ka la don ka Market Committee”,u la ong.
U la ong ba kiba leh pyrshah yn pynshitom katkum ka Plastic Waste Management Rule 2016 hynrei ka Council kam kwah ban don kiba ialeh pyrshah hynrei kyrpad iaki paidbah ban ai ka jingiatreilang.
“Ka EC kala shim da ka rai ban pyniar ban khang pyndonkam plastik ha baroh ki iew ki hat ba don hapoh u pud u sam ka KHADC bad mynta la khot ia u Syiem Hima Sohra ha kaba u paiem ula mynjur ban iatreilang bad ka Council”, la ong u EM ka iew.
Katba u bah TW Chyne u la ong ba kum u MDC ka thain, u kwah ba ka iew Sohra kaba dei kaba heh bha bad ruh ka jaka ba pawnam ha ka kam jngohkai, kan lait na ka plastik. Ula kyntu ia ki paidbah ban iatreilang bad ka Council bad ka Hima ban pynlong kaba jop.
Kumjuh u Syiem u paiem Freeman u la iathuh ba ka Hima ka la don ka Market Committee ban peit ia ka iew. Katkum ka jingong u paiem, ki don kumba 600 tylli eiei ki basa ha iew Sohra.