Tuid da ki hajar, ban pyrshah lehnoh, ha sor bah Tura

Shillong,10 Jylliew:
Da ki hajar ngut ki paidbah ki la tuid sha ka jingiakhih kaba la long ha Ri-lum kum ka dak ka jing pyrshah ia ka jingshah pyniap ka Jospin M Sang ma, ka longkmie ba 35 snem ka kmie jong saw ngut ki khun, kaba la shah siat iap ha ki kynhun lehnoh Garo. Ia katei ka jingiakhih pyrshah la khot da ka Seng kmie na Garo ka Mothers Union, ha kaba ki hajar ngut ryngkat ki pla kad ba la thoh pyrshah ia ka jingshah pyniap ki la wan ban ia shim bynta.
Ia katei ka jingiakhih paidbah la pynlong madan ialehkai jong ka Chandmari, bad ki paidbah kib ala wan ban ia shim bynta ki la pynlong ka jingduwai kyrpang na bynta ka ing ka sem jong katei ka longkmie ba la shah pyniap. Ka la don ruh ka jingiapyrta kaba pynpaw ba ki kwah ban wahrah ia ka shongsuk shongsain. Ha katei ka jingiakhih, la wan ban ia shim bynta da ki sengbhalang bapher bapher, bad ki kynhun balang bapher bapher kynthup ia u Bishop ka Tura, Rev Fr. Andrew Marak .
“Ki kynhun lehnoh ki la pynlehrain ia ka thain jong ngi, ngi pynrem ia katei ka jingleh jong ki , ki dei ban sngew noh ia ki kam khawpud jong ki, ka sorkar Meghalaya ka la dei ban shimkhia ban pynkut noh ia kine ki ei kiei baroh” ong ka Viola Sonatchi B. Sangma, Chairperson barim ka Meghalaya Public Service Commission, haba ai jingkren ha katei ka jingiakhih paidbah.
U Pro- Vice Chancellor barim ka ICFAI University Meghalaya, u Milton Sangma u la ong “Ka jingpyniap bein, ka jinglute bad ka jingrahbor dei ban sangeh shisyndon, ka jingiakieng atiar dei ban sangeh, ki seng lehnoh ki dei ban sngap ia ka jingkhot ka sorkar ban wan sha ka miej jingiakren” . U Milton u la ong ruh ba ka New Delhi ka dei ban tuklar eiei halor katei ka jinglong jingman ka Ri Lum Garo ha kine ki sngi, bad ka dei ban thung ia u ophisar u bal ah ban ia kren bad ki seng lehnoh, u la ong “Ki paidbah kim lah shuh ban shu shong syier, ka la biang ka la biang”. Ha katei ka jingiakhih pyrshah kaba la wan ban ia shim bynta da ki hajar ngut, baroh ki dukan bad ki jaka treikam ki la khang naduh ka por 3 haduh 5 baje janmiet.