Thylli ka stadium, ha ka jingleh burom khadduh ia U President barim ka Zimbabwe

Ka la don ka jing khmih lynti ban khublei khadduh, da kaba don burom ia U Robert Mugabe, uba dei u nongialam ba rim jong ka Zimbabwe, uba la pyllait luid ia katei ka Ri Africa na ka kti ki dohlieh, hynrei ha ka jingialang leh burom ha ka Sngi thohdieng, la iohi, ba tang shiteng ka madan ruh ym don briew satia.

Ka madan, ka dei kaba la mang ia 60hajar ngut ki briew, namar ba ka dei ka Sports Stadium, hynrei la iohi ba ka thylli kreng kreng, namar ba ym don satia kiba kwah ban wan sngewlem ia utei u nongialam ba la khlad noh.
U Mugabe, ula iap ha ka 6tarik Nailur 2019 ha Singapore, ha ka rta kaba 95 snem, hadien ar snem,ba ula shah knieh noh ia ka bor synshar ha u nongialam shipai jongu hi.

Na ka liang jong ka tnga jongu, ka Gucci Grace, kaba la im maphot bad pahuh pahai, ha ki sngi jong ka jinglong President u tnga jongka, ka kwah eh ban tep ia u tnga jongka, ha ka shnong trai jongu, hynrei U President ba mynta jong katei ka ri, U Emmerson Mnangagwa, ula kyntait ia katei ka jingkwah jongka. Utei u nongialam, ula shah sin ruh ha kiba bun ha Zimbabwe, kum u Crocodile’ namar ba u knieh jubor ia ka bor, na U Mugabe, u kwah ban buh ia utei u nongialam ba la khlad ha ka Heroes’ Acre monument. La iathuh ba U President, u kwah ban tei ia u mot sah kynmaw jong utei u nongialam bad kan shim por shibnai, ban tei ia utei u mot bad ka jingtep ia U Mugabe ruh kan nang slem sa shibnai naduh mynta.
Ka tnga jong U Mugabe, ka Gucci Grace, la iathuh ba ka don ia ka spah jongka, kaba haduh 1 billion pound, kaba ka la ioh lum ha ka por jong ka jinglong President u tnga jongka.
U Mugabe, ula synshar donbor ia katei ka ri, na ka bynta 37 snem kynthih, haduh ba un da shah knieh da ka bor ha u nongialam shipai jongu hi, uba dei mynta U President ba thymmai jong ka Zimbabwe.